DakshTimes News Network
अंमली पदार्थ विरोधी पथकाची कारवाई; एमडी, स्कूटर आणि मोबाईलसह १.५२ लाखांचा मुद्देमाल जप्त
काशिनाथ शिंदे
पुणे : शहरात अंमली पदार्थांची विक्री करणाऱ्यांविरोधात पोलिसांनी कारवाईचा धडाका कायम ठेवला आहे. पुणे शहरातील अंमली पदार्थ विरोधी पथकाने शिवाजीनगर येथील संचेती चौक परिसरात सापळा रचून मेफेड्रॉन (एमडी) विक्रीसाठी घेऊन आलेल्या २६ वर्षीय तरुणाला ताब्यात घेतले. या कारवाईत पोलिसांनी एमडीसह स्कूटर आणि मोबाईल असा एकूण १ लाख ५२ हजार ६६० रुपयांचा मुद्देमाल जप्त केला.
पोलिसांना संचेती चौक परिसरात एक तरुण अंमली पदार्थ विक्रीसाठी येणार असल्याची माहिती मिळाली होती. त्यानुसार अंमली पदार्थ विरोधी पथकाने परिसरात सापळा रचला. संशयित तरुण तेथे आल्यानंतर पोलिसांनी त्याला ताब्यात घेतले. त्याची झडती घेतली असता त्याच्याकडे मेफेड्रॉन (एमडी) आढळून आले.
पोलिसांनी एमडी, त्याच्या वापरातील स्कूटर आणि मोबाईल असा एकूण ₹१,५२,६६० किमतीचा मुद्देमाल जप्त केला आहे. आरोपीविरोधात शिवाजीनगर पोलीस ठाण्यात अंमली पदार्थ आणि मनोविकारक पदार्थ कायद्यान्वये (एनडीपीएस) गुन्हा दाखल करण्यात आला आहे.
शहरातील तरुणाईला अंमली पदार्थांच्या विळख्यात ओढणाऱ्या विक्रेत्यांविरोधात पोलिसांकडून सातत्याने कारवाई सुरू असून, संचेती चौकातील या कारवाईमुळे एमडी विक्रीचे आणखी एक प्रकरण उघडकीस आले आहे.
