DakshTimes News Network
परिचारिका मीरा शिंदे यांना ‘हिंद रत्न कामगार पुरस्कार २०२६’ने गौरव
काशिनाथ शिंदे
पिंपरी, “पृथ्वी शेषनागाच्या मस्तकावर तरलेली नसून ती कष्टकरी आणि श्रमिकांच्या तळहातावर तरलेली आहे,” असे लोकशाहीर अण्णाभाऊ साठे यांनी सांगितले आहे. त्याच कष्टकरी आणि श्रमिकांच्या योगदानातून पिंपरी-चिंचवड या औद्योगिक व कामगारनगरीचा विकास झाला आहे, असे प्रतिपादन महापौर रवी लांडगे यांनी केले.
हिंद कामगार संघटनेच्या वर्धापन दिनानिमित्त पिंपरी येथे आयोजित कार्यक्रमात परिचारिका मीरा शिंदे यांना ‘हिंद रत्न कामगार पुरस्कार २०२६’ महापौर रवी लांडगे यांच्या हस्ते प्रदान करण्यात आला. मानपत्र, स्मृतिचिन्ह, शाल, श्रीफळ आणि रोख रक्कम असे या पुरस्काराचे स्वरूप होते.
यावेळी बोलताना महापौर रवी लांडगे म्हणाले की, कामगारांच्या न्याय्य हक्कांसाठी सातत्याने लढणारे इंटकचे प्रदेशाध्यक्ष आणि हिंद कामगार संघटनेचे संस्थापक अध्यक्ष डॉ. कैलास कदम यांच्या नेतृत्वाखाली संघटना देशभर कार्यरत आहे. संघटनेच्या वर्धापन दिनानिमित्त दरवर्षी एका कामगाराचा सन्मान केला जातो. यंदा प्रथमच एका परिचारिका महिलेला हा पुरस्कार देण्यात येत असून, हा केवळ मीरा शिंदे यांचा नव्हे, तर सर्व परिचारिकांचा सन्मान आहे. इतरांसाठीही हा पुरस्कार प्रेरणादायी आहे.
मीरा शिंदे यांनी स्वाईन फ्लू तसेच कोरोना महामारीच्या काळातही रुग्णसेवेचे कर्तव्य अत्यंत जबाबदारीने पार पाडले. नूतन भोसरी रुग्णालयातून स्वेच्छानिवृत्ती घेतलेल्या मीरा शिंदे यांची पुरस्कारासाठी झालेली निवड सार्थ असल्याचेही महापौर लांडगे यांनी सांगितले.
३१ वर्षांची सेवा; महापालिकेत २७ वर्षे रुग्णसेवा
डॉ. कैलास कदम यांनी स्वागत व प्रास्ताविक करताना सांगितले की, राष्ट्रीय मजदूर काँग्रेस (इंटक) ही स्वातंत्र्यपूर्व काळात स्थापन झालेली कामगार संघटना आहे. इंटकचे राष्ट्रीय अध्यक्ष डॉ. जी. संजीवा रेड्डी यांच्या नेतृत्वाखाली हिंद कामगार संघटना कार्यरत आहे. महात्मा गांधी, सरदार वल्लभभाई पटेल, गुलझारीलाल नंदा, पंडित जवाहरलाल नेहरू आणि मौलाना आझाद यांसारख्या दिग्गजांनी इंटकचे नेतृत्व केले आहे.
देशातील अनेक सरकारी आस्थापना तसेच खासगी कारखान्यांमध्ये कामगारांचे नेतृत्व इंटकच्या माध्यमातून केले जाते. यंदाचा ‘हिंद रत्न कामगार पुरस्कार’ महापौर रवी लांडगे यांच्या हस्ते प्रदान करताना आम्हाला विशेष अभिमान वाटत असल्याचे डॉ. कदम यांनी नमूद केले.
मीरा शिंदे यांनी नोकरी आणि कुटुंबाची जबाबदारी समर्थपणे सांभाळत एकूण ३१ वर्षे सेवा केली असून, त्यापैकी २७ वर्षे पिंपरी-चिंचवड महानगरपालिकेत रुग्णसेवा बजावली आहे. त्यांच्या कार्याचा गौरव करताना आम्हाला अभिमान वाटत असल्याचेही डॉ. कैलास कदम यांनी सांगितले.
कार्यक्रमास माजी नगरसेवक सद्गुरु कदम, भारती घाग, निवृत्त पोलीस अधिकारी रघुनाथ मोरे, हाफिज पठाण, आनंदराव फडतरे, यशवंत सुपेकर, शांताराम कदम, सचिन कदम, उत्तम गायकवाड, सारिका भिंगे यांच्यासह मोठ्या संख्येने कामगार बंधू-भगिनी उपस्थित होते.
कार्यक्रमाचे सूत्रसंचालन प्रा. गणेश गोरिले यांनी केले, तर यशवंत सुपेकर यांनी आभार मानले.
