DakshTimes News Network
उत्तर प्रदेशातील तिघे जेरबंद; ८ ट्रान्सफॉर्मर चोरीची कबुली, १२.७३ लाखांचा मुद्देमाल जप्त
काशिनाथ शिंदे : पुणे
पुणे शहरासह ग्रामीण भागात महावितरणचे ट्रान्सफॉर्मर (रोहित्र/डीपी) फोडून त्यातील महागड्या तांब्याच्या तारांची चोरी करणाऱ्या आंतरराज्यीय टोळीचा गुन्हे शाखा युनिट-७च्या पथकाने पर्दाफाश केला. वाडेगाव (ता. हवेली) येथे सापळा रचून संशयित मालवाहू टेम्पोचा पाठलाग करत पोलिसांनी उत्तर प्रदेशातील तिघांना ताब्यात घेतले. त्यांच्याकडून १२ लाख ७३ हजार रुपयांचा मुद्देमाल जप्त करण्यात आला आहे.
अटक करण्यात आलेल्या आरोपींची नावे मोहम्मद साहेबजान मंगरेखान (वय ३०), आदर्श चंद्रप्रकाश पांडे (वय २२) आणि चंद्रसेन शिवरतन धारीया (वय २८) अशी आहेत. तिघेही सासवड येथे राहत असून मूळचे उत्तर प्रदेशातील रहिवासी आहेत.
पोलिसांनी दिलेल्या माहितीनुसार, पोलीस अंमलदार विनायक साळवे यांना मिळालेल्या गोपनीय माहितीच्या आधारे वरिष्ठ पोलीस निरीक्षक वाहिद पठाण आणि पोलीस उपनिरीक्षक राहुल कोळपे यांच्या पथकाने वाडेगाव परिसरात सापळा रचला. संशयित एमएच १२ जीटी ६६७५ क्रमांकाच्या टेम्पोचा पोलिसांनी पाठलाग करून तिघांना ताब्यात घेतले.
चौकशीत आरोपींनी मागील पाच ते सहा महिन्यांत लोणीकंद पोलीस ठाण्याच्या हद्दीतील वाडेगाव, आष्टापूर, सांगवी सांडस, न्हावी सांडस आणि हिंगणगाव परिसरातील शेतांमध्ये तसेच रस्त्यालगत बसविण्यात आलेले एकूण आठ ट्रान्सफॉर्मर फोडून त्यातील तांब्याच्या तारांची चोरी केल्याची कबुली दिल्याचे पोलिसांनी सांगितले.
या कारवाईत पोलिसांनी १२ लाख ७३ हजार रुपये किमतीच्या तांब्याच्या धातूच्या तारा तसेच गुन्ह्यात वापरण्यात आलेला मालवाहू टेम्पो जप्त केला आहे. आरोपींनी आणखी किती ठिकाणी अशाच प्रकारे चोरी केली आहे, याचा तपास गुन्हे शाखेकडून सुरू आहे.
या कारवाईमुळे महावितरणच्या डीपी चोरीच्या घटनांना आळा बसण्यास मदत होणार असून, टोळीतील अन्य साथीदारांचा शोधही घेतला जात आहे.
