DakshTimes News Network
पुणे परिमंडलातील सर्व ५२ उपविभागीय कार्यालयांत सकाळी ११ ते दुपारी १ या वेळेत आयोजन; तक्रारींच्या जागेवरच निवारणावर भर
काशिनाथ शिंदे
पुणे: वीज ग्राहकांच्या समस्या आणि तक्रारींचे स्थानिक पातळीवर तातडीने निराकरण करण्यासाठी महावितरणच्या पुणे परिमंडलात दुसरे ‘ग्राहक समाधान शिबिर’ सोमवार, दि. २१ सप्टेंबर रोजी आयोजित करण्यात आले आहे. पुणे परिमंडलातील सर्व ५२ उपविभागीय कार्यालयांमध्ये सकाळी ११ ते दुपारी १ या वेळेत हे शिबिर होणार आहे.
वीजबिलातील त्रुटी, वीजपुरवठ्यातील अडचणी, मीटरची समस्या, नवीन वीजजोडणी तसेच महावितरणच्या विविध सेवा आणि योजनांबाबतच्या तक्रारी ग्राहकांना थेट संबंधित अधिकारी आणि कर्मचाऱ्यांसमोर मांडता येणार आहेत. शक्य त्या तक्रारींचे जागेवरच निराकरण करण्यावर महावितरणचा भर राहणार आहे.
पुणे परिमंडलात दर महिन्याच्या तिसऱ्या सोमवारी ‘ग्राहक समाधान शिबिर’ आयोजित करण्याचा उपक्रम सुरू करण्यात आला आहे. या माध्यमातून ग्राहक आणि महावितरणचे अधिकारी यांच्यात थेट संवादाची सुविधा उपलब्ध झाली आहे.
पहिल्या शिबिराला १,२९३ ग्राहकांचा प्रतिसाद
यापूर्वी झालेल्या पहिल्या शिबिराला पुणे परिमंडलातील ग्राहकांचा उत्स्फूर्त प्रतिसाद मिळाला होता. या शिबिरात तब्बल १,२९३ ग्राहकांनी सहभाग घेतला, तर विविध समस्यांबाबत ७४४ अर्ज प्राप्त झाले होते. त्यापैकी ६८४ अर्जांचा शिबिरातच निपटारा करण्यात आला. उर्वरित प्रलंबित अर्जांवरही कार्यवाही पूर्ण करून तक्रारींचे निवारण करण्यात आले आहे.
ग्राहकांनी तक्रारींसह सहभागी व्हावे
वीजबिल, मीटर, वीजपुरवठा, वीजजोडणी अथवा महावितरणच्या इतर सेवांशी संबंधित समस्या असलेल्या ग्राहकांनी आवश्यक कागदपत्रांसह आपल्या संबंधित उपविभागीय कार्यालयात आयोजित करण्यात आलेल्या शिबिरात सहभागी व्हावे, असे आवाहन महावितरणकडून करण्यात आले आहे.
