DakshTimes News Network
देहूगावातील ओमकार हाउसिंग सोसायटीत पहाटेची घटना; पती गंभीर जखमी, रुग्णालयात उपचार सुरू
काशिनाथ शिंदे: पिंपरी
देहूगाव : कौटुंबिक वादातून पत्नीवर धारदार शस्त्राने हल्ला करून तिचा खून केल्याची धक्कादायक घटना देहूगाव येथील ओमकार हाउसिंग सोसायटीत रविवारी पहाटे घडली. त्यानंतर पतीने स्वतःवरही वार करून दुसऱ्या मजल्यावरील गॅलरीतून खाली उडी मारल्याचा प्राथमिक संशय पोलिसांनी व्यक्त केला आहे.
या घटनेत शुभांगी आकाश बारस्कर (वय २८) यांचा मृत्यू झाला असून त्यांचे पती आकाश रामदास बारस्कर (वय २६) हे गंभीर जखमी झाले आहेत. त्यांच्यावर रुग्णालयात उपचार सुरू आहेत. आकाश हे एका माहिती-तंत्रज्ञान कंपनीत काम करत असल्याची माहिती पोलिसांनी दिली.
देहूरोड पोलिस ठाण्याचे वरिष्ठ पोलिस निरीक्षक विक्रम बनसोडे यांनी दिलेल्या माहितीनुसार, रविवारी पहाटे सहाच्या सुमारास गस्तीवरील पोलिसांना देहूगावातील ओमकार सोसायटी परिसरात एक व्यक्ती जखमी अवस्थेत पडल्याची माहिती मिळाली. पोलिसांनी घटनास्थळी धाव घेतली असता, घरमालक प्रकाश रामचंद्र राऊत यांच्या घरात भाड्याने राहणारा आकाश बारस्कर रस्त्यावर जखमी अवस्थेत आढळून आला.
त्यानंतर पोलिसांनी घराची पाहणी केली असता, दुसऱ्या मजल्यावरील खोलीत शुभांगी या गंभीर जखमी व बेशुद्ध अवस्थेत आढळून आल्या. पोलिसांनी दोघांनाही तातडीने रुग्णालयात दाखल केले. मात्र, डॉक्टरांनी तपासणीनंतर शुभांगी यांना मृत घोषित केले. आकाश यांच्यावर उपचार सुरू आहेत.
आकाश आणि शुभांगी यांचा डिसेंबर २०२३ मध्ये विवाह झाला होता. गेल्या चार ते पाच महिन्यांपासून हे दाम्पत्य ओमकार सोसायटीत भाड्याने राहत होते. प्राथमिक चौकशीत गेल्या सुमारे वर्षभरापासून दोघांमध्ये कौटुंबिक वाद सुरू असल्याचे समोर आले आहे.
या वादातून आकाशने शुभांगी यांच्यावर धारदार शस्त्राने हल्ला केल्याचा पोलिसांचा प्राथमिक संशय आहे. त्यानंतर आकाशने स्वतःवरही वार करून गॅलरीतून खाली उडी मारल्याची शक्यता पोलिसांनी व्यक्त केली आहे. घटनेमागील नेमके कारण, हल्ल्याची परिस्थिती आणि इतर बाबींचा देहूरोड पोलिसांकडून सखोल तपास सुरू आहे.
