दुष्काळी परिस्थितीत महावितरणचा अतिसतर्कतेचा इशारा!

अभियंते, यंत्रचालक व तारमार्ग कर्मचाऱ्यांना मुख्यालय सोडण्यास सक्त मनाई

काशिनाथ शिंदे

मुंबई: राज्यात पर्जन्यमानात मोठी तूट निर्माण झाल्याने अनेक भागांमध्ये दुष्काळी परिस्थितीचे सावट गडद झाले आहे. या पार्श्वभूमीवर महावितरणने संपूर्ण तांत्रिक यंत्रणेला ‘हायअलर्ट’ दिला असून, दुष्काळाच्या काळात वीजपुरवठा सुरळीत ठेवण्यासाठी अभियंते, यंत्रचालक आणि तारमार्ग कर्मचाऱ्यांना आपापले मुख्यालय सोडण्यास सक्त मनाई करण्यात आली आहे. याबाबत महावितरणचे संचालक (संचालन) धनंजय औंढेकर यांनी परिपत्रक जारी केले आहे.

यंदाच्या जून महिन्यापासून राज्यात पर्जन्यमानात मोठी तूट नोंदविण्यात आली आहे. त्यामुळे राज्याच्या बहुतांश भागात दुष्काळी परिस्थिती निर्माण झाली असून, त्याचा फटका शेती पिकांनाही बसत आहे. या पार्श्वभूमीवर राज्य शासनाने विविध दुष्काळ निवारण उपाययोजना हाती घेतल्या आहेत. त्यानुसार महावितरणनेही राज्यभरातील आपली तांत्रिक यंत्रणा सतर्क केली आहे.

मुख्यमंत्री यांचे अपर मुख्य सचिव तथा महावितरणचे अध्यक्ष व व्यवस्थापकीय संचालक लोकेश चंद्र यांच्या आदेशानुसार महावितरणचे संचालक धनंजय औंढेकर (संचालन), योगेश गडकरी (वाणिज्य), सचिन तालेवार (प्रकल्प), राजेंद्र पवार (मानव संसाधन) यांच्यासह सर्व कार्यकारी संचालकांनी विविध परिमंडलांमध्ये तातडीने दौरे केले.

या दौऱ्यांमध्ये दुष्काळी परिस्थितीत कृषिपंपांसह सर्व वर्गवारीतील ग्राहकांना सुरळीत वीजपुरवठा मिळावा यासाठी आवश्यक तांत्रिक कामांचा आढावा घेण्यात आला. तसेच विविध ठिकाणच्या वीजयंत्रणेची पाहणी करून आवश्यक उपाययोजनांबाबत संबंधित अधिकाऱ्यांना निर्देश देण्यात आले.

परवानगीशिवाय मुख्यालय सोडता येणार नाही

महावितरणच्या सर्व क्षेत्रीय कार्यालयांतील अभियंते, यंत्रचालक आणि तारमार्ग कर्मचाऱ्यांनी आपापल्या मुख्यालयात उपस्थित राहणे बंधनकारक करण्यात आले आहे. कोणत्याही अधिकारी किंवा कर्मचाऱ्याला पूर्वपरवानगीशिवाय मुख्यालय सोडता येणार नाही, असे स्पष्ट निर्देश देण्यात आले आहेत.

दुष्काळी परिस्थितीत शेतीसह इतर सर्व ग्राहकांसाठी अत्यंत महत्त्वाचा असलेला वीजपुरवठा अखंडित आणि सुरळीत राहील, यासाठी विशेष खबरदारी घेण्याच्या सूचना देण्यात आल्या आहेत. एखाद्या कारणामुळे वीजपुरवठा खंडित झाल्यास पर्यायी व्यवस्था उभारून किंवा तातडीने दुरुस्तीची कामे हाती घेऊन वीजपुरवठा पूर्ववत करण्याचे आदेश देण्यात आले आहेत.

हयगय केल्यास शिस्तभंगाची कारवाई

वीजपुरवठा सुरळीत ठेवण्याच्या कामात कोणत्याही प्रकारची हयगय अथवा हलगर्जीपणा केल्यास संबंधित अधिकारी-कर्मचाऱ्यांविरुद्ध शिस्तभंगाची कारवाई करण्यात येईल, असा स्पष्ट इशाराही महावितरणच्या परिपत्रकातून देण्यात आला आहे.

दुष्काळाच्या पार्श्वभूमीवर शेतीसाठी आवश्यक वीजपुरवठा तसेच सर्वसामान्य ग्राहकांचा वीजपुरवठा सुरळीत ठेवण्यास महावितरणने सर्वोच्च प्राधान्य दिले आहे.