DakshTimes News Network
सौर योजनांसह महावितरणच्या विविध सेवांची माहिती एकाच ठिकाणी
काशिनाथ शिंदे
पुणे: वीजग्राहकांना महावितरणच्या विविध सेवा अधिक सुलभ आणि वेगाने उपलब्ध करून देण्याबरोबरच सौरऊर्जा योजनांचा अधिकाधिक नागरिकांनी लाभ घ्यावा, यासाठी महावितरणकडून ‘सेवा सेतू अभियान’ राबविण्यात येत आहे. या अभियानांतर्गत पुणे परिमंडलात २३ ठिकाणी विशेष किऑस्क उभारण्यात आले आहेत.
या किऑस्कवर प्रधानमंत्री सूर्यघर मोफत वीज योजना, स्वयंपूर्ण महाराष्ट्र आवासीय रूफटॉप सोलर योजना, मागेल त्याला सौर कृषी पंप योजना तसेच मुख्यमंत्री सौर कृषी वाहिनी योजना २.० याबाबत नागरिकांना मार्गदर्शन केले जात आहे. योजनांसाठी आवश्यक कागदपत्रे, ऑनलाइन अर्ज प्रक्रिया, आर्थिक लाभ, सौर संच बसविण्याची कार्यपद्धती, अंदाजित खर्च आणि कर्ज सुविधांची माहिती एकाच ठिकाणी उपलब्ध करून देण्यात आली आहे.
स्थानिक बँक प्रतिनिधी तसेच निवडसूचीवरील सौर कंत्राटदारांच्या माध्यमातून नागरिकांना आवश्यक माहिती व समन्वयाची सुविधाही उपलब्ध करून देण्यात आली आहे.
४६४ नागरिकांनी घेतली माहिती
पुणे परिमंडलातील २३ किऑस्कला आतापर्यंत ४६४ नागरिकांनी भेट देऊन सौर योजना आणि महावितरणच्या विविध सेवांची माहिती घेतली आहे. त्यापैकी ६ नवीन अर्ज प्राप्त झाले आहेत.
पुणे शहरातील ९ किऑस्कवर २७० नागरिकांनी, तर पिंपरी-चिंचवड शहरातील १३ किऑस्कवर १८७ नागरिकांनी भेट दिली आहे. राजगुरुनगर येथील किऑस्कवरही ७ नागरिकांनी योजनांची माहिती घेतली आहे.
पुणे शहरासह पिंपरी-चिंचवडमध्ये सुविधा
पुणे शहरातील स्वारगेट, मोदी गणपती, शनिवार पेठ, नारायण पेठ, धानोरी, बाणेर, कर्वेनगर, विश्रांतवाडी आणि लोहगाव येथे किऑस्क उभारण्यात आले आहेत.
पिंपरी-चिंचवड शहरात रहाटणी, हिंजवडी, भोसरी आदी परिसरातील अ, ब, क, ड, ई, फ, जी, ज आणि ल या क्षेत्रीय कार्यालयांच्या हद्दीत किऑस्कची सुविधा उपलब्ध करून देण्यात आली आहे.
हे किऑस्क १७ ऑक्टोबर २०२६पर्यंत सुरू राहणार आहेत. नागरिकांनी या विशेष किऑस्कला भेट देऊन सौर योजनांची माहिती घ्यावी आणि उपलब्ध योजनांचा लाभ घ्यावा, असे आवाहन महावितरणच्या वतीने करण्यात आले आहे.
