DakshTimes News Network
काशिनाथ शिंदे
पिंपरी: शहराच्या स्वच्छतेची धुरा सांभाळणाऱ्या सफाई सेवकांच्या आरोग्य आणि सुरक्षिततेला प्राधान्य देत पिंपरी चिंचवड महानगरपालिकेच्या आरोग्य विभागाच्या वतीने ‘स्वच्छता ही सेवा २०२६’ अभियानांतर्गत सफाई मित्र सुरक्षा शिबिराचे आयोजन करण्यात आले. २८ आणि ३० सप्टेंबर रोजी आयोजित करण्यात आलेल्या या शिबिरांमध्ये अ, ब, क, ड, इ, फ, ग, ह, ज आणि ल या दहाही क्षेत्रीय कार्यालयांच्या कार्यक्षेत्रातील ३,५०० हून अधिक सफाई सेवकांची आरोग्य तपासणी करण्यात आली. थेरगाव येथील स्व. कै. शंकरराव गावडे कामगार भवन येथेही शिबिर घेण्यात आले.
या शिबिरात सफाई सेवकांची हिमोग्लोबिन, रक्तदाब, मधुमेह आदींची मोफत तपासणी करण्यात आली. तसेच संतुलित आहार, नियमित व्यायाम, योगासने, प्राणायाम, ताणतणावाचे व्यवस्थापन आणि नियमित आरोग्य तपासणीचे महत्त्व याबाबत मार्गदर्शन करण्यात आले.
कामाच्या स्वरूपानुसार आवश्यक सुरक्षा साधनांचा वापर करणे, आरोग्यविषयक चांगल्या सवयी अंगीकारणे तसेच आजाराची प्राथमिक लक्षणे दिसून आल्यास वेळ न दवडता वैद्यकीय सल्ला घेण्याचे आवाहन करण्यात आले.
सफाई मित्रांच्या आरोग्य-सुरक्षिततेसाठी प्रतिबंधात्मक उपायांवर भर
यावेळी बोलताना उपआयुक्त डॉ. प्रदीप ठेंगल म्हणाले, “सफाई सेवक हे शहराच्या स्वच्छतेतील महत्त्वाचे घटक आहेत. कामाच्या स्वरूपानुसार आवश्यक सुरक्षा साधनांचा वापर करणे आवश्यक आहे. त्याचबरोबर आरोग्याची नियमित तपासणी करून योग्य ती काळजी घेणेही तितकेच महत्त्वाचे आहे. आरोग्यविषयक समस्या सुरुवातीच्या टप्प्यातच लक्षात आल्यास त्यावर वेळेत उपाययोजना करता येतात. त्यामुळे सफाई मित्रांच्या आरोग्य आणि सुरक्षिततेसाठी प्रतिबंधात्मक उपाययोजनांवर भर देण्यात येत आहे.”
कचरा वेचकांच्या सुरक्षिततेला प्राधान्य देत डॉ. प्रदीप ठेंगल यांच्या हस्ते सुरक्षा साधनांचे वाटप करण्यात आले.
महिला व बालकल्याण योजनांचीही माहिती
शिबिराच्या माध्यमातून समाज विकास विभागाच्या महिला व बालकल्याण योजनांची माहिती देण्यात आली. महिला बचतगट, विधवा व घटस्फोटित महिलांसाठी स्वयंरोजगार, कौशल्य व व्यवसाय प्रशिक्षण तसेच विविध आर्थिक सहाय्य योजनांची माहिती देऊन पात्र महिलांनी या योजनांचा लाभ घ्यावा, असे आवाहन करण्यात आले.
“महिला व बालकल्याण विभागाच्या विविध योजनांचा लाभ गरजू आणि पात्र महिलांपर्यंत पोहोचविण्यासाठी प्रयत्न करण्यात येत आहेत. आर्थिक सहाय्य, कौशल्य प्रशिक्षण आणि स्वयंरोजगाराच्या माध्यमातून महिलांना सक्षम करण्याचा या योजनांचा उद्देश आहे,” असेही डॉ. ठेंगल यांनी नमूद केले.
यावेळी डॉ. शिवाजी ढगे, डॉ. शंकर मोसलगी, डॉ. कुलभूषण कुलकर्णी, डॉ. तुषार जाधव, सहायक आरोग्य अधिकारी श्रीराम गायकवाड, राजेश भाट, अंकुश झिटे, अतुल सोनवणे, कांचनकुमार इंदलकर, योगेश फल्ले तसेच आरोग्य निरीक्षक, संबंधित अधिकारी, कर्मचारी आणि सफाई सेवक उपस्थित होते.
कार्यक्रमाचे प्रास्ताविक अक्षय पाटील यांनी केले. उपस्थितांचे आभार सहा. आरोग्य अधिकारी श्रीराम गायकवाड यांनी मानले.
