DakshTimes News Network
काशिनाथ शिंदे
पिंपरी: पिंपरी-चिंचवड महानगरपालिकेच्या वतीने राष्ट्रपिता महात्मा गांधी आणि भारतरत्न, माजी पंतप्रधान लालबहादूर शास्त्री यांच्या जयंतीनिमित्त पिंपरी येथील मुख्य प्रशासकीय इमारतीत अभिवादन करण्यात आले. उपमहापौर शर्मिला बाबर यांनी महात्मा गांधी व लालबहादूर शास्त्री यांच्या प्रतिमांना पुष्पहार अर्पण करून अभिवादन केले.
यावेळी महानगरपालिकेचे विरोधी पक्षनेते भाऊसाहेब भोईर, नगरसदस्या अनुराधा गोरखे, उपआयुक्त अण्णा बोदडे, जनता संपर्क अधिकारी प्रफुल्ल पुराणिक, सामाजिक कार्यकर्ते युवराज दाखले यांच्यासह विविध विभागांतील अधिकारी व कर्मचारी उपस्थित होते.
महात्मा गांधी यांनी सत्य, अहिंसा आणि स्वच्छतेचा आग्रह धरत देशवासीयांना प्रेरणा दिली. असहकार आंदोलन आणि भारत छोडो आंदोलनाच्या माध्यमातून त्यांनी स्वातंत्र्यलढ्याला व्यापक जनाधार मिळवून दिला. त्यामुळे ते देशातील स्वातंत्र्यसैनिक आणि देशभक्तांसाठी प्रेरणास्थान ठरले.
भारताचे माजी पंतप्रधान भारतरत्न लालबहादूर शास्त्री हे थोर स्वातंत्र्यसैनिक, मुत्सद्दी राजकारणी आणि प्रखर देशभक्त म्हणून ओळखले जातात. देशाच्या सुरक्षेसाठी सैन्यदलाच्या पाठीशी संपूर्ण देशवासीयांनी ठामपणे उभे राहावे, असा संदेश देत त्यांनी देशवासीयांमध्ये राष्ट्रीय एकात्मता आणि देशभक्तीची भावना दृढ केली.
