DakshTimes News Network
तिसऱ्या बॅचला १० ऑक्टोबरपासून सुरुवात; ग्रामीण भागातील निवडक पाच प्रशिक्षणार्थींना निवास व भोजनाची मोफत सुविधा
काशिनाथ शिंदे
पिंपरी पुणे: युवती व महिलांना अभियांत्रिकी आणि उत्पादन क्षेत्रातील रोजगाराच्या संधींसाठी आवश्यक तांत्रिक कौशल्य उपलब्ध करून देण्याच्या उद्देशाने इंजिनिअरिंग क्लस्टर, पुणे यांच्या वतीने महिलांसाठी सहा महिन्यांचे मोफत तांत्रिक प्रशिक्षण आयोजित करण्यात आले आहे. या प्रशिक्षणाच्या तिसऱ्या बॅचला १० ऑक्टोबर २०२६ पासून सुरुवात होणार असल्याची माहिती इंजिनिअरिंग क्लस्टर, पुणेचे संचालक सागर शिंदे यांनी दिली.
ला फाउंडेशन डसॉल्ट सिस्टीम्स, पुणे यांच्या सामाजिक दायित्व निधीच्या सहकार्याने ‘इंडस्ट्रियल एस्पायरा – अॅडव्हान्स सर्टिफिकेशन इन सीएनसी ऑपरेशन, डिझाईन अँड क्वालिटी कंट्रोल’ हा प्रशिक्षण उपक्रम राबविण्यात येत आहे. प्रशिक्षण पूर्णतः मोफत असून ग्रामीण भागातील निवडक पाच प्रशिक्षणार्थींना निवास व भोजनाची सुविधाही मोफत उपलब्ध करून देण्यात येणार आहे.
या उद्योगाभिमुख प्रशिक्षणामध्ये सीएनसी प्रोग्रामिंग व ऑपरेशन, डिझाईन, गुणवत्ता नियंत्रण, उत्पादन प्रक्रिया, व्यक्तिमत्त्व विकास व संवादकौशल्य, प्रत्यक्ष औद्योगिक भेटी, प्रात्यक्षिक प्रशिक्षण तसेच प्रत्यक्ष उद्योगातील प्रशिक्षण यांचा समावेश आहे.
प्रशिक्षणासाठी किमान बारावी उत्तीर्ण आणि १८ ते २५ वर्षे वयोगटातील युवती व महिला अर्ज करू शकतात. सहा महिन्यांचे हे प्रशिक्षण इंजिनिअरिंग क्लस्टर, पुणे, ५३५ जे ब्लॉक, गवळी माथा, एमआयडीसी, भोसरी, पुणे येथे होणार आहे. प्रशिक्षण पूर्ण केल्यानंतर पुणे व परिसरातील अभियांत्रिकी आणि उत्पादन उद्योगांमध्ये रोजगाराच्या संधी मिळाव्यात यासाठी नोकरीसाठी मार्गदर्शन व सहकार्य उपलब्ध करून देण्यात येणार आहे.
या उपक्रमाच्या पहिल्या दोन बॅचला मिळालेल्या प्रतिसादाच्या पार्श्वभूमीवर तिसऱ्या बॅचचे आयोजन करण्यात आले आहे. तांत्रिक क्षेत्रात करिअर करू इच्छिणाऱ्या युवती व महिलांनी या मोफत प्रशिक्षणाचा लाभ घ्यावा, असे आवाहन संचालक सागर शिंदे यांनी केले आहे.
प्रवेश व अधिक माहितीसाठी समन्वयक मनीषा मॅडम – ९०२८५८७८७१ या क्रमांकावर संपर्क साधावा. तसेच finance@enggclusterpune.com या ई-मेलवर संपर्क साधता येईल.
