DakshTimes News Network
१२ खेळाडूंची उल्लेखनीय कामगिरी; १० सुवर्ण, ९ रौप्य आणि ५ कांस्य पदकांची कमाई
चाकण : स्कूल ऑफ मार्शल आर्टच्या वतीने रविवार, दि. ४ ऑक्टोबर रोजी राज्यस्तरीय किकबॉक्सिंग स्पर्धेचे आयोजन करण्यात आले होते. या स्पर्धेत चाकण कराटे अकादमीच्या १२ विद्यार्थी-विद्यार्थिनींनी उत्स्फूर्त सहभाग नोंदवत आपल्या कौशल्याची दमदार छाप पाडली.
स्पर्धेत चाकण कराटे अकादमीच्या खेळाडूंनी उत्कृष्ट खेळाचे प्रदर्शन करत तब्बल २४ पदकांसह एक पारितोषिक पटकावले. यामध्ये १० सुवर्ण, ९ रौप्य आणि ५ कांस्य पदकांचा समावेश आहे.
या यशासाठी अकादमीचे प्रशिक्षक मयूर राजाराम शिंदे सर आणि श्रुतिका भानुदास पानसरे यांनी खेळाडूंना सातत्यपूर्ण मार्गदर्शन व प्रशिक्षण दिले. त्यांच्या मार्गदर्शनामुळे विद्यार्थ्यांनी आत्मविश्वासाने स्पर्धेत सहभाग घेत उल्लेखनीय यश संपादन केले.
खेळाडूंच्या या यशाबद्दल प्रशिक्षक मयूर शिंदे आणि श्रुतिका पानसरे यांचे मनःपूर्वक अभिनंदन करण्यात येत असून, त्यांनी विद्यार्थ्यांवर दाखविलेला विश्वास आणि त्या विश्वासाला सार्थ ठरविणाऱ्या सर्व खेळाडूंचेही कौतुक होत आहे.
चाकण कराटे अकादमीच्या या यशामुळे अकादमीच्या शिरपेचात आणखी एक मानाचा तुरा रोवला गेला असून, आगामी स्पर्धांसाठी सर्व खेळाडूंना पुढील वाटचालीसाठी मनःपूर्वक शुभेच्छा देण्यात आल्या.
