राजगडावर महावितरण कर्मचाऱ्यांनी दाखवली माणुसकी!

प्रकृती बिघडलेल्या पर्यटकाच्या मदतीसाठी पाच कर्मचारी धावले; रुग्णालयात उपचारादरम्यान मृत्यू

काशिनाथ शिंदे

पुणे : पुणे जिल्ह्यातील राजगड किल्ला चढताना जिज्ञेश खंडाळकर (वय ३५) या पर्यटकाची प्रकृती अचानक बिघडल्याची दुर्दैवी घटना घडली. त्यांना हृदयविकाराचा झटका आल्याची शक्यता प्राथमिक माहितीतून व्यक्त करण्यात येत आहे. या कठीण प्रसंगी महावितरणच्या वेल्हा शाखेतील पाच कर्मचाऱ्यांनी तत्परतेने मदतीसाठी धाव घेत माणुसकीचे दर्शन घडवले.

राजगड किल्ल्यावरील वीजपुरवठा सुरळीत करून खाली उतरत असताना महावितरणचे कर्मचारी निलेश शेंडकर, रवींद्र कातूर्डे, राहुल भुरूक, शंकर रसाळ आणि चेतन चोरघे यांना पुरातत्त्व विभागाचे कर्मचारी व स्थानिक नागरिक संबंधित पर्यटकाला किल्ल्यावरून खाली आणत असल्याचे दिसले. परिस्थितीचे गांभीर्य ओळखून या पाचही कर्मचाऱ्यांनी तत्काळ मदतीसाठी पुढाकार घेतला. इतरांसोबत बचावकार्यात सहभागी होत त्यांनी खंडाळकर यांना किल्ल्यावरून खाली आणण्यासाठी प्रयत्न केले.

मात्र, रुग्णालयात दाखल केल्यानंतर डॉक्टरांनी त्यांना मृत घोषित केले. या दुर्दैवी घटनेमुळे परिसरात हळहळ व्यक्त होत आहे.

कर्तव्याबरोबरच सामाजिक बांधिलकी

वीजपुरवठा सुरळीत करण्याचे कर्तव्य पार पाडल्यानंतर परतत असतानाही संकटात सापडलेल्या पर्यटकाच्या मदतीसाठी धावून जाणाऱ्या महावितरणच्या या पाचही कर्मचाऱ्यांच्या तत्परतेचे कौतुक होत आहे. कर्तव्याच्या पलीकडे जाऊन त्यांनी दाखवलेली सामाजिक बांधिलकी आणि माणुसकी अनेकांसाठी प्रेरणादायी ठरली आहे.

महावितरणचे कर्मचारी केवळ वीजसेवेचे सेवक नसून, संकटाच्या काळात नागरिकांच्या मदतीला धावून जाणारे माणुसकीचे दूतही आहेत, याची प्रचिती या घटनेतून आली.