DakshTimes News Network
आरपीआय आठवले गटातून भाजपमध्ये प्रवेश; लांडेवाडीतील सामाजिक कार्याची दखल
काशिनाथ शिंदे
पिंपरी : भारतीय जनता पक्षाच्या अनुसूचित जाती मोर्चाच्या पिंपरी-चिंचवड शहर जिल्हा उपाध्यक्षपदी भोसरीतील लांडेवाडी येथील अक्षय दुनघव यांची नियुक्ती करण्यात आली आहे. भाजपचे शहराध्यक्ष शत्रुघ्न काटे आणि अनुसूचित जाती मोर्चाचे शहराध्यक्ष बापू घोलप यांनी ही नियुक्ती केली. आमदार अमित गोरखे यांच्या हस्ते सोमवारी (दि. १२ ऑक्टोबर) दुनघव यांना नियुक्तिपत्र प्रदान करण्यात आले.
दुनघव हे यापूर्वी रिपब्लिकन पार्टी ऑफ इंडिया (आठवले गट) मध्ये पिंपरी-चिंचवड शहर संघटक सचिव म्हणून कार्यरत होते. महापालिका निवडणुकीत ऐनवेळी उमेदवारी न मिळाल्याने ते नाराज होते. त्यानंतर त्यांनी भाजपमध्ये प्रवेश केला. आता पक्षाने त्यांच्यावर अनुसूचित जाती मोर्चाच्या शहर उपाध्यक्षपदाची जबाबदारी सोपविली आहे.
लांडेवाडी परिसरात अक्षय दुनघव यांनी सामाजिक कार्याच्या माध्यमातून आपली ओळख निर्माण केली आहे. स्थानिक पातळीवर त्यांना मानणारा वर्ग असल्याने त्यांच्या नव्या नियुक्तीकडे राजकीय वर्तुळाचे लक्ष लागले आहे.
नव्या जबाबदारीच्या माध्यमातून अनुसूचित जातींसह वंचित समाजघटकांचे प्रश्न सोडविण्यासाठी आणि पक्षसंघटना अधिक बळकट करण्यासाठी प्रयत्न करणार असल्याचे दुनघव यांनी नियुक्तीनंतर सांगितले. समाजातील वंचित घटकांना न्याय मिळवून देण्यासाठी प्रामाणिकपणे काम करण्याची ग्वाहीही त्यांनी दिली.
