DakshTimes News Network
महावितरणच्या ‘सन्मान सौदामिनींचा’ सोहळ्यात नवदुर्गांचा गौरव; महिला कर्मचाऱ्यांच्या योगदानाचा गौरव
काशिनाथ शिंदे: पुणे
महिलांच्या योगदानाची जाणीव ठेवणे, त्यांच्या कार्याचा आदर करणे आणि त्यांच्या कर्तृत्वाला योग्य सन्मान देणे, हाच खऱ्या अर्थाने महिलांच्या सन्मानाचा पाया आहे, असे प्रतिपादन महावितरणचे संचालक (मानव संसाधन) राजेंद्र पवार यांनी केले.
महावितरणमध्ये कार्यरत महिला अभियंता, अधिकारी आणि कर्मचाऱ्यांच्या कार्याचा गौरव करण्यासाठी गणेशखिंड येथील प्रकाशभवन सभागृहात बुधवारी (दि. १४ ऑक्टोबर) ‘सन्मान सौदामिनींचा’ या विशेष सोहळ्याचे आयोजन करण्यात आले होते. या कार्यक्रमात महिलांच्या कर्तृत्वाचा गौरव करण्यात आला.
यावेळी बोलताना राजेंद्र पवार म्हणाले की, महिलांना विविध आघाड्यांवर अनेक जबाबदाऱ्या पार पाडाव्या लागतात. घर, कुटुंब आणि कार्यक्षेत्र अशा विविध स्तरांवर त्या आपले योगदान देत असतात. त्यांच्या प्रयत्नांची आणि योगदानाची जाणीव ठेवणाऱ्या पुरुषांच्या मनात महिलांविषयीचा आदर आपोआप वाढतो.
कार्यक्रमाच्या अध्यक्षस्थानी प्रभारी मुख्य अभियंता ज्ञानदेव पडळकर होते. त्यांनी सांगितले की, कर्मचाऱ्यांच्या कल्याणासाठी असलेल्या कालबाह्य योजनांना काळानुरूप नवे स्वरूप देतानाच संचालक राजेंद्र पवार यांनी त्यांच्या अर्थसंकल्पीय तरतुदीत भरघोस वाढ केली आहे. महिला एखादे काम पूर्ण करण्याचा निर्धार करतात, तेव्हा ते पूर्ण केल्याशिवाय मागे हटत नाहीत. त्यांच्या जिद्दीचा, मेहनतीचा आणि कर्तृत्वाचा गौरव होणे आवश्यक आहे.
या सोहळ्यात कार्यकारी अभियंता अपर्णा मुनशेट्टीवार, जलतरणपटू नेहा बनसोड, हिना कुरणे, अनिता वाकसे, भाग्यश्री जोशी, नितल हासे, शितल बोथे आणि सुरभी टाकसाळे यांनी आपले अनुभव कथन केले. आपल्या कार्यक्षेत्रातील आव्हाने, अनुभव आणि यशस्वी वाटचालीतील विविध पैलू त्यांनी उपस्थितांसमोर मांडले.
महिला कर्मचाऱ्यांचा सन्मान
या कार्यक्रमाला प्रभारी मुख्य अभियंता ज्ञानदेव पडळकर, अधीक्षक अभियंता सिंहाजीराव गायकवाड, सुरेश सवाईराम, सहायक महाव्यवस्थापक (विवले) कीर्ती भोसले, सहायक महाव्यवस्थापक (मानव संसाधन) सत्यजित राजेशिर्के व दीप्ती अंबेकर, कार्यकारी अभियंता अपर्णा मुनशेट्टीवार, उपमुख्य औद्योगिक संबंध अधिकारी भूपेंद्र वाघमारे आणि उपकार्यकारी अभियंता डॉ. संतोष पटणी यांच्यासह महावितरणमधील महिला अभियंता, अधिकारी व कर्मचारी मोठ्या संख्येने उपस्थित होते.
कार्यक्रमात उपस्थित सर्व महिलांना गुलाबपुष्प आणि पुस्तक देऊन सन्मानित करण्यात आले. भक्ती जोशी आणि स्वागती सोळंकुरे यांनी सूत्रसंचालन केले, तर अधीक्षक अभियंता सिंहाजीराव गायकवाड यांनी आभार मानले.
