DakshTimes News Network
पहाटेच्या सुमारास पोलिसांची कारवाई; १०६ ग्रॅम मेफेड्रॉन हस्तगत
काशिनाथ शिंदे
रावेत: रावेत परिसरात विक्रीच्या उद्देशाने बाळगलेले ३ लाख १८ हजार रुपये किमतीचे १०६ ग्रॅम मेफेड्रॉन (एमडी) अंमली पदार्थ रावेत पोलिसांनी जप्त केले. या प्रकरणी दोन तरुणांना अटक करण्यात आली असून, त्यांच्याविरुद्ध अंमली पदार्थ प्रतिबंधक कायद्यान्वये (एनडीपीएस) गुन्हा दाखल करण्यात आला आहे.
पोलिसांनी दिलेल्या माहितीनुसार, रविवार, दि. २५ ऑक्टोबर रोजी पहाटे २.३५ वाजण्याच्या सुमारास रावेत बीआरटी रस्त्यालगत, सेलेस्टियल सिटी सोसायटीकडे जाणाऱ्या रस्त्यावरील किडझी प्री-स्कूलच्या मागील मोकळ्या जागेत ही कारवाई करण्यात आली. या ठिकाणी संशयितांकडे मेफेड्रॉन असल्याची माहिती मिळाल्यानंतर पोलिसांनी कारवाई करून अंमली पदार्थांचा साठा जप्त केला.
या प्रकरणी चैतन्य श्याम कांबळे (वय २०) आणि कैलाश देवजी चौधरी (वय २६) यांना अटक करण्यात आली आहे. त्यांच्याकडून १०६ ग्रॅम मेफेड्रॉन जप्त करण्यात आले असून, त्याची बाजारातील किंमत ३ लाख १८ हजार रुपये असल्याचे पोलिसांनी सांगितले.
एनडीपीएस कायद्यान्वये गुन्हा
अटक केलेल्या दोघांविरुद्ध रावेत पोलीस ठाण्यात एनडीपीएस कायद्याच्या कलम ८(क), २२(क) आणि २९ अन्वये गुन्हा दाखल करण्यात आला आहे. जप्त केलेल्या अंमली पदार्थांचा स्रोत, त्याची विक्री आणि या प्रकरणातील संभाव्य सहभाग याबाबत पोलीस तपास करत आहेत.
या प्रकरणाचा पुढील तपास रावेत पोलीस करीत आहेत.
