DakshTimes News Network
४२ अग्निशमन वाहने आणि २५० जवानांची शहरभर सज्जता; तत्पर प्रतिसादामुळे जीवितहानी टळली
काशिनाथ शिंदे
पिंपरी : लक्ष्मीपूजनाच्या दिवशी फटाक्यांच्या आतषबाजीसह विविध कारणांमुळे पिंपरी-चिंचवड शहरात आगीच्या तब्बल ७६ घटनांची नोंद झाली. निवासी इमारती, घरे, दुकाने, मोकळी मैदाने, वाहने आणि झाडांना आग लागण्याच्या घटनांनी अग्निशमन विभागाची दिवसभर धावपळ उडाली. मात्र, अग्निशमन जवानांच्या तत्परतेमुळे सर्व घटनांवर नियंत्रण मिळवण्यात यश आले. विशेष म्हणजे, या घटनांमध्ये कोणतीही जीवितहानी अथवा दुखापत झाली नाही.
२० इमारतींमध्ये आग; ५० ठिकाणी गवत, कचरा जळाला
नोंदविण्यात आलेल्या ७६ घटनांपैकी २० घटना फ्लॅट, घरे आणि दुकानांना आग लागण्याच्या होत्या. तर ५० ठिकाणी मोकळ्या मैदानातील गवत, कचरा आणि झाडांना आग लागली. उर्वरित सहा घटनांमध्ये फ्लेक्स, कंपाउंड, वाहने आणि टॉवरला आग लागल्याची नोंद करण्यात आली.
स्पाईन रोडवरील सेक्टर १२ मधील निवासी इमारतीच्या अकराव्या मजल्यावरील फ्लॅट, जाधववाडी-चिखली येथील आठव्या मजल्यावरील फ्लॅट आणि मोशीतील मंत्रा मोमेंट सोसायटी परिसरात आगीच्या घटना घडल्या.
मोरवाडी येथे चारचाकी वाहनाला, तर काळेवाडीतील बारणे कॉर्नर, थेरगाव येथे दोन दुचाकींना आग लागली. याशिवाय भोसरीतील लांडेवाडी, थरमॅक्स चौक-चिखली रस्ता, पिंपरी चौकातील गोकुळ हॉटेल परिसर, चिंचवडमधील एम्पायर इस्टेट परिसरातील नदीपात्र, मोई-निघोजे रस्ता, मोशी कब्रस्तान परिसर, निगडी प्राधिकरणातील गणेश तलाव, चिंतामणी चौक, चिंचवड चौक आणि चिंचोळे नगर परिसरातही आगीच्या घटना घडल्या.
नेहरूनगरमधील मयूर पॅनोरमा सोसायटी परिसरात गवताला, पिंपळे सौदागर येथील प्लॅनेट मिलेनियम सोसायटी परिसरात नारळाच्या झाडाला, तर पिंपळे गुरवमधील भैरवनाथ नगर परिसरात कचऱ्याला आग लागली. प्रत्येक ठिकाणी अग्निशमन जवानांनी तातडीने धाव घेत आगीचा प्रसार रोखला.
४२ अग्निशमन वाहने, २५० अधिकारी-कर्मचारी तैनात
दिवाळीच्या पार्श्वभूमीवर आगीच्या संभाव्य घटना लक्षात घेऊन महापालिकेच्या अग्निशमन विभागाने विशेष पूर्वतयारी केली होती. शहरातील नियमित १० अग्निशमन केंद्रांव्यतिरिक्त आणखी १२ महत्त्वाच्या ठिकाणी अग्निशमन वाहने आणि आवश्यक मनुष्यबळ तैनात करण्यात आले होते.
या विशेष व्यवस्थेंतर्गत शहरभर ४२ अग्निशमन वाहने आणि २५० अधिकारी-कर्मचारी सज्ज ठेवण्यात आले होते. त्यामुळे आगीची माहिती मिळताच जवळचे पथक तातडीने घटनास्थळी पोहोचू शकले. या नियोजनामुळे संभाव्य मोठी दुर्घटना टळली.
नागरिकांनी अग्निसुरक्षेचे नियम पाळावेत
निवासी इमारती, व्यावसायिक संकुले आणि औद्योगिक आस्थापनांमध्ये अग्निसुरक्षेच्या नियमांचे काटेकोर पालन करावे. आपत्कालीन परिस्थितीत अग्निशमन विभागाच्या १०१ किंवा ७०३०१०८९९१ या मुख्य अग्निशमन केंद्राच्या क्रमांकावर संपर्क साधावा, असे आवाहन महापालिकेच्या वतीने करण्यात आले आहे.
डॉ. विजय सूर्यवंशी, आयुक्त, पिंपरी-चिंचवड महापालिका म्हणाले, “दिवाळीच्या काळात नागरिकांची सुरक्षितता लक्षात घेऊन महापालिकेच्या वतीने विशेष नियोजन करण्यात आले होते. शहरातील १० अग्निशमन केंद्रांसह १२ महत्त्वाच्या ठिकाणी अग्निशमन वाहने व मनुष्यबळ तैनात करण्यात आले होते. अधिकारी-कर्मचाऱ्यांच्या तत्परतेमुळे आगीच्या घटनांवर वेळीच नियंत्रण मिळविता आले. नागरिकांची सुरक्षितता ही महापालिकेची सर्वोच्च प्राथमिकता आहे.”
व्यंकटेश दुर्वास, उपआयुक्त, पिंपरी-चिंचवड महापालिका म्हणाले, “दिवाळीच्या कालावधीत आगीच्या घटनांना तातडीने प्रतिसाद देता यावा, यासाठी अग्निशमन विभागाची संपूर्ण यंत्रणा सज्ज ठेवण्यात आली होती. ४२ अग्निशमन वाहने आणि २५० अधिकारी-कर्मचाऱ्यांच्या माध्यमातून शहरभर कार्यवाही करण्यात आली. जवानांच्या समन्वयपूर्ण आणि तत्पर कामगिरीमुळे सर्व घटनांमध्ये जीवितहानी टाळणे शक्य झाले. नागरिकांनीही अग्निसुरक्षेच्या नियमांचे पालन करून प्रशासनाला सहकार्य करावे.”
