DakshTimes News Network
नोटांच्या बंडलांनी सजवलेल्या ताटांतून दिला दिवाळी बोनस; कर्मचाऱ्यांच्या डोळ्यांत आनंदाश्रू, समाजमाध्यमांवर व्यावसायिकाचे कौतुक
काशिनाथ शिंदे
गुजरात : दिवाळी म्हटले की आनंद, उत्साह आणि भेटवस्तूंची रेलचेल आलीच. नोकरदार वर्गासाठी दिवाळी बोनस म्हणजे विशेष पर्वणी असते. मात्र, गुजरातमधील सुरत येथील एका कापड व्यावसायिकाने आपल्या कर्मचाऱ्यांना दिलेली भेट सध्या सर्वांचे लक्ष वेधून घेत आहे. या व्यावसायिकाने तब्बल २० कर्मचाऱ्यांना प्रत्येकी एक लाख रुपयांहून अधिक रकमेचा दिवाळी बोनस देत माणुसकीचे दर्शन घडवले आहे.
रामस्वरूप मुंडे असे या उदार मनाच्या व्यावसायिकाचे नाव असून, सुरतमधील मोटा वराछा परिसरातील सुदामा चौक येथे त्यांचे ‘महादेव क्लॉथ सेंटर’ हे कापड दुकान आहे. त्यांनी कर्मचाऱ्यांना बोनस देण्यासाठीही अनोखी पद्धत अवलंबली. चांदीसारख्या आकर्षक पूजेच्या ताटांमध्ये १०, २०, ५०, १००, २०० आणि ५०० रुपयांच्या नव्या नोटांचे बंडल सजवून प्रत्येक कर्मचाऱ्याला भेट देण्यात आले.
अचानक मिळालेली ही लाखमोलाची भेट पाहून कर्मचारी भारावून गेले. काही कर्मचाऱ्यांना तर आनंदाश्रू अनावर झाले. या अनोख्या दिवाळी भेटीचा व्हिडिओ समाजमाध्यमांवर मोठ्या प्रमाणात प्रसारित होत असून, मुंडे यांच्या उदारतेचे सर्वत्र कौतुक होत आहे.
या भेटीमागे केवळ आर्थिक मदतीचा विचार नसून एक भावनिक नातेदेखील आहे. रामस्वरूप मुंडे यांनी स्वतः गरिबीचे दिवस अनुभवले आहेत. त्यामुळे सणासुदीच्या काळात आर्थिक अडचणींमुळे कुटुंबाचा आनंद हिरावला जाऊ नये, याची त्यांना जाणीव आहे.
‘कर्मचारी हे केवळ कामगार नसून आपल्या कुटुंबाचाच एक भाग आहेत. वर्षभर त्यांच्या मेहनतीमुळे व्यवसायाची प्रगती होते. त्यामुळे त्यांच्या कुटुंबीयांनाही आनंदाने दिवाळी साजरी करता यावी,’ या भावनेतून त्यांनी हा बोनस दिल्याचे सांगितले जाते.
पैशांपेक्षा मोठी माणुसकीची भेट!
व्यवसायात नफा कमावणारे अनेक असतात; मात्र आपल्या यशात हातभार लावणाऱ्या कर्मचाऱ्यांच्या आनंदाचाही विचार करणारे व्यावसायिक विरळाच. रामस्वरूप मुंडे यांनी दिलेली ही भेट केवळ आर्थिक मदत नसून मालक आणि कर्मचारी यांच्यातील जिव्हाळ्याच्या नात्याचे उदाहरण ठरली आहे.
खऱ्या अर्थाने दिवाळीचा प्रकाश घरात दिवे लावूनच नव्हे, तर दुसऱ्यांच्या आयुष्यात आनंदाचा उजेड पसरवून निर्माण होतो! ❤️
