DakshTimes News Network
पोलिस बंदोबस्तातील न्यायालयीन नेण्याच्या व्हिडिओंना आक्रमक ऑडिओची जोड; वाळूज पोलिसांच्या भूमिकेकडे लक्ष
काशिनाथ शिंदे
छत्रपती संभाजीनगर : वाळूज एमआयडीसी पोलीस ठाण्याच्या हद्दीतील एका आरोपीच्या दोन रिल्स सध्या समाजमाध्यमांवर मोठ्या प्रमाणात व्हायरल होत आहेत. विशेष म्हणजे, पोलिसांच्या बंदोबस्तात संबंधित आरोपीला न्यायालयात घेऊन जातानाचे व्हिडिओ वापरून त्यावर ‘एकच गेम वाजवणार, अख्खा जिल्हा गाजवणार’ असा आक्रमक ऑडिओ लावण्यात आला आहे.
या रिल्समुळे परिसरात चर्चेला उधाण आले असून, समाजमाध्यमांवर अशा प्रकारे गुन्हेगारी प्रवृत्तीचे उदात्तीकरण केले जात असल्याचा मुद्दा ऐरणीवर आला आहे. पोलिसांच्या कारवाईचे व्हिडिओ वापरून आरोपीची दहशत किंवा दबदबा दाखवण्याचा प्रयत्न होत असल्याची चर्चा नागरिकांमध्ये सुरू आहे.
दरम्यान, या दोन्ही रिल्सची वाळूज एमआयडीसी पोलिसांकडून दखल घेतली जाणार का? संबंधित व्हिडिओ तयार करणारे आणि प्रसारित करणाऱ्यांची चौकशी होणार का? तसेच कायद्याच्या चौकटीत आवश्यक ती कारवाई केली जाणार का, असे प्रश्न उपस्थित होत आहेत.
आता या व्हायरल रिल्सप्रकरणी वाळूज पोलिस कोणती भूमिका घेतात, याकडे सर्वांचे लक्ष लागले आहे.
