DakshTimes News Network
आदर्शमाता चंद्रभागाताईंचे ८४ व्या वर्षी निधन; प्रेम, माया आणि कौटुंबिक संस्कारांचा वारसा मागे
काशिनाथ शिंदे
पिंपरी : पिंपरीगावातील आदर्शमाता चंद्रभागा सुदाम भालेराव (वय ८४) यांचे मंगळवारी (दि. १० नोव्हेंबर) वृद्धापकाळाने खडकवासला (ता. हवेली) येथे निधन झाले. त्या गेल्या ५० वर्षांहून अधिक काळ पिंपरी येथे वास्तव्यास होत्या. प्रकृती आणि वयोमानामुळे गेल्या पाच-सहा महिन्यांपासून त्या खडकवासला येथे आपल्या भावाकडे राहत होत्या. महाराष्ट्र नवनिर्माण सेना जनहित कक्षाचे राज्य उपाध्यक्ष राजू भालेराव यांच्या त्या मातोश्री होत.
त्यांच्या पश्चात चार मुले, एक मुलगी, सुना, जावई, नातवंडे, नातसुना आणि पतवंडे असा मोठा परिवार आहे.
चंद्रभागाताईंचा स्वभाव अत्यंत शांत, मनमिळाऊ आणि प्रेमळ होता. साधी राहणी आणि उच्च विचारसरणीचा आदर्श जपत त्यांनी संपूर्ण आयुष्य कुटुंबाच्या जडणघडणीसाठी समर्पित केले. स्वतः अशिक्षित गृहिणी असूनही कुटुंबाला संस्कारांची शिदोरी देण्यात आणि संसाराचा गाडा समर्थपणे सांभाळण्यात त्यांचे योगदान मोलाचे होते. घर आणि कुटुंब हीच त्यांची कर्मभूमी होती.
नातेसंबंधांना आयुष्यात सर्वोच्च स्थान देणाऱ्या चंद्रभागाताईंनी आपल्या प्रेमळ स्वभावातून नात्यांची वीण घट्ट बांधून ठेवली होती. नातेवाईकांशी जिव्हाळ्याचे संबंध जपत त्यांनी मोठा नातलग परिवार एकत्रित ठेवला. त्यांच्या सहवासात नातेवाईकांचा कायम राबता असायचा. कुटुंबातील प्रत्येक व्यक्तीला आपुलकीने जोडून ठेवण्याची त्यांची हातोटी विशेष होती.
स्वतःला शिक्षणाची संधी मिळाली नसली, तरी पुढील पिढीने उच्च शिक्षण घेऊन प्रगती करावी, ही त्यांची मनापासून इच्छा होती. त्यांच्या संस्कारांमुळे कुटुंबात शैक्षणिक वातावरण निर्माण झाले. त्यांच्या चार मुलांपैकी एक मुलगा बारावीपर्यंत, तर तीन मुले बी.कॉम. पदवीधर आहेत. मुलगीही बी.कॉम. पदवीधर असून जावई पशुवैद्यकीय डॉक्टर आहेत. सुनांमध्ये दहावी, बारावी तसेच बी.कॉम. आणि बी.ए. पदवीधरांचा समावेश आहे. नातवंडांनीही बी.कॉम., बी.ए., बी.एस्सी. आणि विद्युत अभियांत्रिकीपर्यंत शिक्षण घेतले आहे. काही नातवंडे उच्च शिक्षण घेत असून नातसुना देखील पदवीधर आहेत.
पन्नास वर्षांहून अधिक काळ पिंपरीला आपली कर्मभूमी मानून राहिलेल्या चंद्रभागाताईंनी प्रेम, माया, आपुलकी आणि संस्कारांच्या बळावर कुटुंबाला एकसंध ठेवले. त्यांच्या निधनाने भालेराव कुटुंबीयांनी प्रेमळ मातृछत्र गमावले असून नातेवाईक आणि परिचितांकडून हळहळ व्यक्त होत आहे. त्यांच्या आठवणी आणि संस्कारांचा ठेवा कायम कुटुंबीयांच्या स्मरणात राहील.
