DakshTimes News Network
काशिनाथ शिंदे पिंपरी-चिंचवड
मोशी कचरा डेपो येथे घडलेल्या दुर्घटनेनंतर बचावकार्याला युद्धपातळीवर वेग देण्यात आला असून, आपत्ती व्यवस्थापन मंत्री मा. ना. गिरीशभाऊ महाजन यांनी घटनास्थळी भेट देत परिस्थितीची प्रत्यक्ष पाहणी केली. त्यांनी संबंधित यंत्रणांकडून सुरू असलेल्या बचाव मोहिमेचा सविस्तर आढावा घेत आवश्यक सूचना दिल्या.
अधिकृत माहितीनुसार, आतापर्यंत ढिगाऱ्याखालून ९ कर्मचाऱ्यांना सुखरूप बाहेर काढण्यात आले असून त्यांना तातडीने उपचारासाठी रुग्णालयात दाखल करण्यात आले आहे. उर्वरित अडकलेल्या कर्मचाऱ्यांच्या सुरक्षित सुटकेसाठी भारतीय सेना, अग्निशमन दल, एनडीआरएफ, महापालिका, पोलीस प्रशासन तसेच इतर सर्व संबंधित यंत्रणा रात्रंदिवस अथक प्रयत्न करत आहेत.
दरम्यान, महापौर रवि लांडगे यांनी बचावकार्यावर सातत्याने लक्ष ठेवले असून प्रत्येक क्षण परिस्थितीचा आढावा घेत असल्याचे सांगितले. “उर्वरित सर्व कर्मचारीही सुखरूप बाहेर येतील, असा आम्हाला ठाम विश्वास आहे. पांडुरंगाच्या कृपेने प्रत्येक जीव सुरक्षित राहावा आणि प्रत्येक कुटुंबाला दिलासा मिळावा, हीच प्रार्थना आहे,” असे त्यांनी नमूद केले.
प्रशासनाने नागरिकांना अफवांवर विश्वास न ठेवण्याचे आवाहन केले असून अधिकृत माहितीलाच प्राधान्य देण्याची विनंती केली आहे. संपूर्ण यंत्रणा बचावकार्य यशस्वी करण्यासाठी युद्धपातळीवर कार्यरत असून प्रत्येक जीव सुरक्षित बाहेर काढण्यासाठी सर्वतोपरी प्रयत्न सुरू आहेत.
