Oplus_131072
काशिनाथ शिंदे पिंपरी चिंचवड
मोशी येथील घनकचरा प्रकल्प परिसरात घडलेल्या भीषण इमारत दुर्घटनेनंतर आता पिंपरी-चिंचवड पोलिसांनी तपासाची सूत्रे हाती घेतली असून, या दुर्घटनेमागील नेमके कारण काय, याचा सर्वंकष तपास सुरू करण्यात आला आहे. दुर्घटनेत एका कामगाराचा मृत्यू झाल्याने पोलिसांनी आकस्मिक मृत्यूची नोंद केली असून, मृत्यूला कारणीभूत ठरलेल्या सर्व बाबींची कसून चौकशी केली जाणार आहे.
दुर्घटना नेमकी कशी घडली? इमारत कोसळण्यामागे निष्काळजीपणा, तांत्रिक त्रुटी किंवा अन्य कोणते कारण होते का? संबंधित प्रकल्प, कंत्राटदार अथवा इतर जबाबदार व्यक्तींची भूमिका काय होती? या सर्व मुद्द्यांचा तपास पोलीस विविध अंगांनी करत आहेत.
या पार्श्वभूमीवर पिंपरी-चिंचवड पोलीस आयुक्त विनयकुमार चौबे यांनी आज घटनास्थळी भेट देऊन संपूर्ण परिस्थितीची पाहणी केली. तपास यंत्रणेला निष्पक्ष आणि सखोल चौकशी करण्याच्या सूचना देण्यात आल्या असून, आवश्यक पुरावे संकलित करण्याचे काम सुरू आहे.
याबाबत माहिती देताना पोलीस उपायुक्त (डीसीपी) मारुती जगताप यांनी सांगितले की, दुर्घटनेतील मृत्यूमागील नेमके कारण शोधण्यासाठी सर्व संबंधित बाबींची बारकाईने तपासणी करण्यात येत असून, चौकशीत जे काही निष्पन्न होईल त्यानुसार पुढील कायदेशीर कारवाई केली जाईल.
दरम्यान, या भीषण दुर्घटनेनंतर शहरात मोठी खळबळ उडाली असून, प्रशासन, पोलीस आणि संबंधित यंत्रणांकडून या प्रकरणातील प्रत्येक पैलूची चौकशी सुरू आहे. तपास अहवालानंतर दुर्घटनेला जबाबदार असणाऱ्यांवर कठोर कारवाई होण्याची शक्यता व्यक्त केली जात आहे.
About the Author
