DakshTimes News Network
काशिनाथ शिंदे पिंपरी
चिंचवडमधील मोहननगर परिसरात किरकोळ कारणावरून झालेल्या वादाचे पर्यवसान थेट चाकूहल्ल्यात झाल्याची धक्कादायक घटना समोर आली आहे. या प्रकरणात चिंचवड पोलिसांनी आदित्य गायकवाड (वय १९, रा. काळभोर नगर, चिंचवड) याला अटक केली असून, त्याच्यासोबत एका विधिसंघर्षग्रस्त बालकाचाही सहभाग असल्याचे तपासात निष्पन्न झाले आहे.
पोलिसांनी दिलेल्या माहितीनुसार, ८ जुलै रोजी रात्री सुमारे ११ वाजण्याच्या सुमारास सह्याद्री इंडस्ट्रीसमोर, सेंट अँड्र्यूज स्कूलजवळ फिर्यादी शंकर कृष्णा कापले हे मित्रांसोबत उभे असताना आरोपींनी त्यांच्याशी वाद घालण्यास सुरुवात केली. यावेळी फिर्यादीच्या मित्राला शिवीगाळ करून दमदाटी करण्यात आली.
वाद अधिक चिघळल्यानंतर आरोपींनी “तुझ्यात दम असेल तर चाकू काढ” असे आव्हान देत जवळील चाकू काढून फिर्यादीच्या मित्राच्या पाठीवर वार केला. या हल्ल्यात संबंधित तरुण गंभीर जखमी झाला. त्यानंतर आरोपींनी फिर्यादीचाही पाठलाग करून मारहाण करण्याचा प्रयत्न केल्याची नोंद तक्रारीत करण्यात आली आहे.
या घटनेनंतर चिंचवड पोलिसांनी तातडीने कारवाई करत मुख्य आरोपी आदित्य गायकवाड याला अटक केली. त्याच्याविरुद्ध भारतीय न्याय संहिता (BNS), भारतीय हत्यार कायदा तसेच महाराष्ट्र पोलीस अधिनियम अंतर्गत गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक राजपूत करीत आहेत.
घटनेमुळे मोहननगर परिसरात काही काळ तणावाचे वातावरण निर्माण झाले होते. पोलिसांनी नागरिकांना अफवांवर विश्वास न ठेवण्याचे आणि कायदा-सुव्यवस्था राखण्यासाठी सहकार्य करण्याचे आवाहन केले आहे.
