DakshTimes News Network
काशिनाथ शिंदे नागपूर
उमरेड (नागपूर) : उमरेड वनपरिक्षेत्रात दहशत माजवणाऱ्या नरभक्षक वाघिणीला जेरबंद करण्यासाठी नागपूरच्या धाडसी पशुवैद्यकीय अधिकारी डॉ. प्रियल चौरागडे यांनी जीवाची पर्वा न करता थरारक मोहिम यशस्वी केली. तब्बल १५ तास पिंजऱ्यात ‘जिवंत आमिष’ बनून बसत, त्यांनी अतुलनीय धाडस आणि संयमाचे दर्शन घडवले.
वन विभागाने आखलेल्या विशेष मोहिमेदरम्यान वाघिणीला जेरबंद करण्यासाठी डॉ. चौरागडे यांनी अत्यंत मर्यादित जागेतून जीव धोक्यात घालून पिंजऱ्यात स्थान घेतले. समोर मृत्यूचे सावट असतानाही त्यांनी अजिबात धीर सोडला नाही. योग्य क्षण साधत त्यांनी अचूक डार्ट फेकून वाघिणीला बेशुद्ध केले. त्यानंतर वन विभागाच्या पथकाने वाघिणीला सुरक्षितपणे ताब्यात घेतले.
या संपूर्ण कारवाईत डॉ. प्रियल चौरागडे यांनी दाखवलेले धैर्य, संयम आणि कर्तव्यनिष्ठा याचे सर्वत्र कौतुक होत आहे. त्यांच्या या शौर्यपूर्ण कामगिरीमुळे संभाव्य मोठा अनर्थ टळला असून परिसरातील नागरिकांनीही सुटकेचा श्वास घेतला आहे.
डॉ. प्रियल चौरागडे यांच्या या अद्वितीय धाडसामुळे त्या आज सोशल मीडियावर चर्चेचा विषय ठरल्या असून, अनेकांकडून त्यांना “महाराष्ट्राची वाघीण” अशी गौरवपूर्ण उपाधी देत सलाम केला जात आहे.
