DakshTimes News Network
काशिनाथ शिंदे : वाकड
पिंपरी-चिंचवड, : वाकड पोलीस ठाण्याच्या हद्दीतील ताथवडे परिसरात १० वर्षीय मुलीवर वारंवार लैंगिक अत्याचार केल्याप्रकरणी ६१ वर्षीय आरोपीला वाकड पोलिसांनी अटक केली आहे. या प्रकरणात चार वर्षांच्या दुसऱ्या चिमुरडीशीही गैरवर्तनाचा प्रयत्न केल्याचा आरोप असून, आरोपीविरुद्ध पोक्सो कायदा तसेच अनुसूचित जाती-जमाती अत्याचार प्रतिबंधक कायद्यान्वये गंभीर गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार महिला (वय ३०, रा. ताथवडे) यांनी दिलेल्या फिर्यादीवरून रमजान बन्नूसाब बागवान (वय ६१, रा. ताथवडे) याच्याविरुद्ध गुन्हा दाखल करण्यात आला आहे.
फिर्यादीनुसार, मे २०२६ ते २७ जुलै २०२६ या कालावधीत आरोपीने ताथवडे येथील आपल्या घरात तक्रारदाराच्या १० वर्षीय मुलीला जबरदस्तीने नेऊन तिच्यावर वारंवार लैंगिक अत्याचार केला. तसेच तक्रारदाराच्या चार वर्षीय मुलीलाही जबरदस्तीने घरात नेल्याचा आरोप करण्यात आला आहे.
या प्रकरणी भारतीय न्याय संहिता २०२३ मधील संबंधित कलमे, पोक्सोकायदा २०१२ तसेच अनुसूचित जाती व अनुसूचित जमाती (अत्याचार प्रतिबंधक) अधिनियम, १९८९ अंतर्गत गुन्हा दाखल करण्यात आला असून, वाकड पोलीस अधिक तपास करत आहेत.
पोलिसांनी नागरिकांना आवाहन केले आहे की, बालकांवरील अत्याचार किंवा संशयास्पद घटना आढळल्यास तात्काळ पोलिसांना माहिती द्यावी.
