DakshTimes News Network
काशिनाथ शिंदे : पिंपरी
साहित्यरत्न, लोकशाहीर अण्णाभाऊ साठे यांच्या १०६ व्या जयंतीचे औचित्य साधत पिंपरी-चिंचवड महानगरपालिकेच्या वतीने शहरात प्रथमच भव्य ‘साहित्यरत्न दौड २०२६’ मॅरेथॉनचे आयोजन करण्यात आले आहे. सामाजिक सलोखा, आरोग्यदायी जीवनशैली आणि अण्णाभाऊ साठे यांच्या विचारांचा जागर करण्याच्या उद्देशाने आयोजित करण्यात आलेल्या या मॅरेथॉनला नागरिकांचा उत्स्फूर्त प्रतिसाद मिळत आहे.
या भव्य दौडीच्या यशस्वी नियोजनासाठी पिंपरी-चिंचवड महानगरपालिकेत नुकतीच महत्त्वपूर्ण आढावा बैठक पार पडली. स्पर्धेचे नियोजन, वाहतूक व्यवस्था, सुरक्षा, वैद्यकीय सुविधा आणि धावपटूंसाठी आवश्यक सोयी-सुविधांबाबत सविस्तर चर्चा करून संबंधित विभागांना आवश्यक सूचना देण्यात आल्या.
शहरभरातील दोन हजारांहून अधिक धावपटूंनी या मॅरेथॉनसाठी नोंदणी केली असून, ही स्पर्धा २ ऑगस्ट २०२६ रोजी सकाळी बडबॅली उद्यान चौक, शाहूनगर, चिंचवड येथून उत्साहपूर्ण वातावरणात सुरू होणार आहे.
अण्णाभाऊ साठे यांच्या कार्याला अभिवादन करत त्यांच्या प्रेरणादायी विचारांचा संदेश जनतेपर्यंत पोहोचविण्यासाठी आयोजित करण्यात आलेली ही ‘साहित्यरत्न दौड २०२६’ शहराच्या क्रीडा आणि सांस्कृतिक इतिहासातील एक संस्मरणीय उपक्रम ठरणार असल्याचा विश्वास आयोजकांनी व्यक्त केला आहे.
