DakshTimes News Network
काशिनाथ शिंदे : पिंपरी चिंचवड
चिखली पोलीस ठाण्याच्या गुन्हे शोध पथकाने वाहनचोरी करणाऱ्या दोन सराईत आरोपींना अटक करत वाहन चोरीचे तब्बल पाच गुन्हे उघडकीस आणले आहेत. आरोपींकडून २ लाख ९५ हजार रुपये किमतीच्या चार मोटारसायकली आणि एक ऑटो रिक्षा असा एकूण मुद्देमाल हस्तगत करण्यात आला आहे.
अटक करण्यात आलेल्या आरोपींची नावे राज संतोष बापर्डेकर (वय २३, रा. ताम्हाणेवस्ती, चिखली) आणि शंकरसिंगसमंदरसिंगटाक(वय१८,रा. गाडीतळ, हडपसर) अशी आहेत. दोघांकडे सखोल चौकशी केली असता चिखली पोलीस ठाण्यात दाखल असलेले वाहन चोरीचे पाच गुन्हे त्यांनी केल्याची कबुली दिली.
पोलिसांनी या कारवाईत चिखली पोलीस ठाण्यातील गुन्हा क्रमांक ४१०, ४९८, ४७२, ४७४ आणि ३२२/२०२६ हे भारतीय न्याय संहितेच्या कलम ३०३(२) अंतर्गत दाखल असलेले पाचही गुन्हे उघडकीस आणले.
तपासात आरोपी राज बापर्डेकर हा रेकॉर्डवरील सराईत गुन्हेगार असून त्याच्याविरुद्ध यापूर्वी १२वाहन चोरीचे गुन्हे दाखल असल्याचे निष्पन्न झाले आहे. तर शंकरसिंग टाक हा देखील सराईत गुन्हेगार असून तो हडपसर, मांजरी, येरवडा आणि निगडी पोलीस ठाण्यांमध्ये दाखल असलेल्या चार गंभीर गुन्ह्यांमध्ये पाहिजे आरोपी असल्याचे तपासात समोर आले.
सध्या दोन्ही आरोपींना अटक करण्यात आली असून ते पोलीस कोठडीत आहेत. पुढील तपास चिखली पोलीस करत आहेत.
ही कारवाई चिखली पोलीस ठाण्याचे वरिष्ठ पोलीस निरीक्षक रणजित जाधव यांच्या मार्गदर्शनाखाली करण्यात आली.
