DakshTimes News Network
काशिनाथ शिंदे : देहूरोड
साहित्यरत्न, लोकशाहीर अण्णाभाऊ साठे यांच्या १०६ व्या जयंतीनिमित्त बहुजन विकास आघाडीच्या वतीने देहूरोड येथे शनिवारी (दि. १ ऑगस्ट) विविध सामाजिक, सांस्कृतिक आणि अभिवादन कार्यक्रमांचे आयोजन करण्यात आले आहे. कार्यक्रमाचे संयोजक संजय धुतडमल यांनी ही माहिती दिली.
देहूरोड कॅन्टोन्मेंट बोर्डाच्या यशवंतराव चव्हाण सभागृहात तसेच शंकर मंदिराजवळील साहित्यरत्न लोकशाहीर अण्णाभाऊ साठे यांच्या नियोजित उद्यानात मुख्य अभिवादन सोहळा पार पडणार आहे. या कार्यक्रमात अण्णाभाऊ साठे यांच्या कार्याचा गौरव करत त्यांच्या विचारांचा जागर करण्यात येणार आहे.
कार्यक्रमास देहूरोड कॅन्टोन्मेंट बोर्डाच्या मुख्य कार्यकारी अधिकारी पुष्पांजली रावत, प्रशासक ॲड. कैलास पानसरे, सहाय्यक पोलीस आयुक्त प्रवीण मोरे, देहूरोड पोलीस ठाण्याचे वरिष्ठ पोलीस निरीक्षक विक्रम बनसोडे, गुन्हे शाखेचे वरिष्ठ पोलीस निरीक्षक संदीप सावंत, वाहतूक विभागाचे सहाय्यक पोलीस निरीक्षक नितीन अंभोरे यांच्यासह विविध क्षेत्रांतील मान्यवर उपस्थित राहणार आहेत.
कार्यक्रमाच्या यशस्वी आयोजनासाठी राजाराम अस्वरे, संजय साठे, प्रतीक धुतडमल, कोमल शिंदे, कैलास वारके, आनंद साळवे आणि लखन धुतडमल यांनी विशेष परिश्रम घेतले आहेत. अण्णाभाऊ साठे यांच्या विचारांना अभिवादन करण्यासाठी नागरिकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन आयोजकांनी केले आहे.
