DakshTimes News Network
काशिनाथ शिंदे : नाशिक
कुंभमेळ्याच्या कामांच्या नावाखाली तब्बल ५९१ कोटी रुपयांच्या बनावट वर्क ऑर्डर तयार केल्याचा धक्कादायक प्रकार समोर आला आहे. नाशिक विभागीय आयुक्त प्रवीण गेडाम यांच्या बनावट स्वाक्षरीचा वापर करून या वर्क ऑर्डर काढण्यात आल्याचे पोलिसांच्या तपासात समोर आले आहे. या प्रकरणी नाशिक रोड पोलीस ठाण्यात गुन्हा दाखल करण्यात आला असून पोलिसांनी तिघांना अटक केली आहे.
या कारवाईत जळगाव जिल्ह्यातील तनय अनंत महाजन आणि नरेंद्र महाजन यांच्यासह तिघांना पोलिसांनी ताब्यात घेतले आहे. अटक करण्यात आलेले आरोपी हे कुंभमेळा मंत्री गिरीश महाजन यांच्या जामनेर मतदारसंघातील रहिवासी असल्याची माहिती समोर आली आहे.
पोलिसांच्या प्राथमिक तपासानुसार, आतापर्यंत ५९१ कोटी रुपयांच्या पाच बनावट वर्क ऑर्डर समोर आल्या आहेत. या कागदपत्रांमध्ये विभागीय आयुक्तांच्या बनावट स्वाक्षरीचा वापर करण्यात आल्याचा आरोप आहे.
या प्रकरणामुळे कुंभमेळ्याच्या कामांमध्ये बनावट कागदपत्रांचा वापर करून मोठ्या आर्थिक गैरव्यवहाराचा प्रयत्न झाला का, याबाबत प्रश्न उपस्थित झाले आहेत. नाशिक रोड पोलिसांकडून अटक आरोपींची चौकशी सुरू असून या प्रकरणामागे आणखी कोणाचा सहभाग आहे का, याचा तपास केला जात आहे.
दरम्यान, या प्रकरणामुळे नाशिक आणि जळगावच्या राजकीय वर्तुळात खळबळ उडाली असून, तपासातून पुढे काय निष्पन्न होते याकडे सर्वांचे लक्ष लागले आहे.
