DakshTimes News Network
काशिनाथ शिंदे :पुणे
पुणे महानगरपालिकेत कनिष्ठ अभियंता, वरिष्ठ अभियंता आणि उपआयुक्त पदावर नोकरी लावून देण्याचे आमिष दाखवून एका व्यक्तीकडून तब्बल १५ लाख रुपये उकळल्याचा प्रकार समोर आला आहे. नोकरी न देता बनावट नियुक्तीपत्रे, बदली आदेश आणि ओळखपत्र देऊन फसवणूक केल्याप्रकरणी शिवानंद बाळासाहेब पाटील (वय ४५, रा. आनंद कॉलनी, कर्वेनगर) याच्याविरुद्ध पर्वती पोलिस ठाण्यात गुन्हा दाखल करण्यात आला आहे.
या प्रकरणी निलेश हनुमंत शिंदे (वय ३५, रा. धायरी) यांनी पोलिसांत फिर्याद दिली आहे. भारतीय न्याय संहितेतील कलम ३१८(४), ३१६(२), ३१६(५), ३३६(२), ३३६(३), ३३८ आणि ३४०(२) अन्वये गुन्हा दाखल करण्यात आला आहे. डिसेंबर २०२३ पासून हा प्रकार सुरू असल्याचे पोलिसांनी नमूद केले आहे.
पोलिसांच्या माहितीनुसार, आरोपी पाटील याने आपण पुणे महानगरपालिकेत क्रीडा अधीक्षक म्हणून कार्यरत असल्याचे तसेच मंत्रालयात आपली चांगली ओळख असल्याचे सांगून शिंदे यांचा विश्वास संपादन केला. त्यानंतर महापालिकेत विविध पदांवर नोकरी लावून देण्याचे आमिष दाखवून त्यांच्याकडून १५ लाख रुपये घेतले.
रक्कम घेतल्यानंतर आरोपीने पुणे महानगरपालिकेच्या नावाने स्वाक्षरी असलेली बनावट नियुक्तीपत्रे, बदली आदेश तसेच बनावट ओळखपत्र शिंदे यांना दिले. मात्र प्रत्यक्षात त्यांना कोणतीही नोकरी मिळाली नाही. आपली फसवणूक झाल्याचे लक्षात आल्यानंतर शिंदे यांनी पर्वती पोलिस ठाण्यात धाव घेत तक्रार दाखल केली.
विशेष म्हणजे, पाटील हा पुणे महानगरपालिकेत शिपाई म्हणून कार्यरत असल्याचेही पोलिस तपासात समोर आले आहे. या प्रकरणाचा पुढील तपास पर्वती पोलिस करीत आहेत.
