DakshTimes News Network
काशिनाथ शिंदे : खेड
अवैध हातभट्टी दारू निर्मितीविरोधात पिंपरी-चिंचवड पोलिसांच्या दारूबंदी युनिटने मोठी धडक कारवाई करत खेड तालुक्यातील शेल पिंपळगाव परिसरातील हातभट्टीचा अड्डा उद्ध्वस्त केला. या कारवाईत तब्बल १,५०० लिटर कच्चे रसायन, ३५ लिटर तयार हातभट्टी दारू आणि इतर साहित्य जप्त करण्यात आले असून दोन आरोपींना अटक करण्यात आली आहे.
पिंपरी-चिंचवड पोलीस आयुक्तालयाच्या दारूबंदी युनिटचे पोलीस निरीक्षक भास्कर पुल्ली यांच्या मार्गदर्शनाखाली सहाय्यक पोलीस निरीक्षक मोरे, पोलीस नाईक गोनटे, पोलीस शिपाई गुट्टे, खेडकर, महिला पोलीस शिपाई बेंजरपे आणि चालक पोलीस शिपाई गर्जे यांचे पथक परिसरात गस्त घालत असताना मिळालेल्या गोपनीय माहितीच्या आधारे उत्तर चाकण पोलीस ठाण्याच्या हद्दीतील ओढ्यालगतच्या भागात छापा टाकण्यात आला.
१७ जून रोजी दुपारी साडेदोनच्या सुमारास म्हाबरे वस्ती, रामनगर, दौंडकर वाडी (शेल पिंपळगाव), ता. खेड येथे करण्यात आलेल्या या कारवाईत दोन इसम हातभट्टी दारू निर्मितीसाठी लागणारे पदार्थमिश्रित रसायन साठवून ठेवत असल्याचे निदर्शनास आले. पोलिसांनी तत्काळ कारवाई करून दोघांना ताब्यात घेतले.
अटक करण्यात आलेल्या आरोपींमध्ये प्रद्युम्न बिरबल राठोड आणि राहुल राजू धनगर (दोघेही रा. दौंडकर वाडी, शेल पिंपळगाव, ता. खेड, जि. पुणे) यांचा समावेश आहे.
कारवाईदरम्यान सुमारे ५२ हजार ५०० रुपये किमतीचे १,५०० लिटर कच्चे रसायन, ३५ लिटर हातभट्टी दारू तसेच दारू निर्मितीसाठी वापरण्यात येणारे साहित्य जप्त करण्यात आले. आरोपींविरुद्ध उत्तर चाकण पोलीस ठाण्यात भारतीय न्याय संहिता (बीएनएस) कलम १२३, ३(५) तसेच महाराष्ट्र दारूबंदी अधिनियम कलम ६५ (ब), ६५ (ई) आणि ६५ (फ) अन्वये गुन्हा दाखल करण्यात आला आहे.
दारूबंदी युनिटच्या या कारवाईमुळे परिसरात सुरू असलेल्या अवैध हातभट्टी दारू निर्मितीच्या धंद्याला मोठा आळा बसला असून पुढील तपास उत्तर चाकण पोलीस करीत आहेत.
