DakshTimes News Network
बेलोमेंडा लोढा सोसायटी शोकसागरात; प्रत्येक पावलागणिक हुंदके, प्रत्येक डोळ्यात अश्रू…
काशिनाथ शिंदे : गहुंजे
काही घटना अशा असतात की त्या फक्त बातम्या राहत नाहीत, तर हजारो हृदयांची वेदना बनतात. शनिवारी (दि. २७) सायंकाळी गहुंजे येथील उच्चभ्रू बेलोमेंडा लोढा सोसायटीत असेच हृदय पिळवटून टाकणारे दृश्य पाहायला मिळाले. केतन अग्रवाल याच्या हत्येचा निषेध आणि त्याला न्याय मिळावा, या मागणीसाठी हजारो रहिवासी हातात मेणबत्त्या घेऊन शांतपणे रस्त्यावर उतरले. मात्र त्या शांततेतही प्रत्येक पावलागणिक वेदनेचा आक्रोश दडलेला होता.
या वेळी संपूर्ण परिसर शोकसागरात बुडाला होता. मेणबत्त्यांचा प्रकाश दिसत होता, पण प्रत्येकाच्या डोळ्यांत दुःखाचा अंधार दाटला होता. अनेक माता आपल्या मुलांना घट्ट मिठी मारून अश्रू ढाळत होत्या. वडिलांच्या चेहऱ्यावरची असहाय्यता आणि तरुणांच्या डोळ्यांतील संताप प्रत्येकाला अस्वस्थ करून जात होता. या कॅण्डल मार्चमध्ये केतनचे संपूर्ण कुटुंब सहभागी झाले होते. मार्च क्लब हाऊसजवळ पोहोचताच केतनच्या आठवणींनी अग्रवाल कुटुंबाचा अश्रूंचा बांध फुटला. त्या आईचा हंबरडा, वडिलांच्या डोळ्यांतून ओघळणारे अश्रू आणि कुटुंबीयांची वेदना पाहून उपस्थित हजारो नागरिकही स्वतःचे अश्रू रोखू शकले नाहीत. काही क्षणांसाठी संपूर्ण परिसर स्तब्ध झाला.
मार्चमध्ये सहभागी प्रत्येकाच्या मनात एकच प्रश्न घुमत होता आज केतन… उद्या कोण?, तर प्रत्येकाच्या ओठांवर एकच मागणी होती केतनला न्याय मिळालाच पाहिजे!” अनेकांनी भरल्या डोळ्यांनी भावना व्यक्त करत सांगितले, “कोणत्याही आई-वडिलांच्या आयुष्यात आपल्या लेकराला अशा प्रकारे गमावण्याची वेळ येऊ नये. ही वेदना शब्दांत मांडता येणार नाही.” हा कॅण्डल मार्च केवळ निषेध नव्हता; तो एका निष्पाप जीवासाठी न्यायाची आर्त हाक होती. हजारो मेणबत्त्या पेटल्या होत्या, पण प्रत्येक ज्योतीमागे एक वेदना, एक अश्रू आणि एकच प्रार्थना होती ती म्हणजे केतनला न्याय मिळू दे… आणि अशी काळी वेळ पुन्हा कोणत्याही कुटुंबावर येऊ नये.”
