Oplus_131072
काशिनाथ शिंदे .पिंपरी, दि. १७ जून : रावेत परिसरात महिलांच्या गळ्यातील सोन्याचे दागिने हिसकावून पळ काढणाऱ्या सराईत चैन स्नॅचर टोळीचा रावेत पोलिसांनी पर्दाफाश केला असून दोन आरोपींना अटक करण्यात आली आहे. आरोपींकडून सोन्याचे दागिने आणि चोरीची दुचाकी असा एकूण २ लाख ६५ हजार रुपयांचा मुद्देमाल जप्त करण्यात आला आहे.
रावेत पोलीस ठाण्यात गुन्हा क्रमांक १९८/२०२६ भारतीय न्याय संहिता कलम ३०९ (४), ३ (५) अन्वये गुन्हा दाखल करण्यात आला होता. फिर्यादी कविता मिलिंद केसरकर (वय ५५) या २ जून २०२६ रोजी सायंकाळी पतीसोबत फिरत असताना नव्यम कन्स्ट्रक्शन साईटजवळ दुचाकीवरून आलेल्या अज्ञात चोरट्यांनी त्यांच्या गळ्यातील मिनी गंठण हिसकावून नेले होते.
या गुन्ह्याचा तपास वरिष्ठ पोलीस निरीक्षक नितीन फटांगरे यांच्या मार्गदर्शनाखाली करण्यात आला. घटनास्थळ परिसरातील सीसीटीव्ही फुटेज, तांत्रिक विश्लेषण आणि गुप्त माहितीच्या आधारे पोलिसांनी आरोपींचा माग काढला. पोलीस शिपाई अजित बेंडभर व विनोद कदम यांनी आरोपींना ताब्यात घेण्यात महत्त्वाची भूमिका बजावली.
तपासादरम्यान आदित्य परशुराम मनलोर (वय १९, रा. पाटील इस्टेट, शिवाजीनगर, पुणे) आणि फिदा मनुआली इराणी (वय ३५, रा. पाटील इस्टेट, शिवाजीनगर, पुणे) यांनी दुचाकी क्रमांक KA-38-EA-8929 चा वापर करून रावेत परिसरात दोन चैन स्नॅचिंगचे गुन्हे केल्याची कबुली दिली.
पोलिसांनी आरोपींकडून रावेत पोलीस ठाण्यातील दोन चैन स्नॅचिंग प्रकरणांतील १ लाख ६५ हजार रुपयांचे सोन्याचे दागिने तसेच कर्नाटकातील बिदर ग्रामीण पोलीस ठाण्याच्या हद्दीतील मोटारसायकल चोरी प्रकरणातील एक लाख रुपये किंमतीची दुचाकी जप्त केली. अशा प्रकारे एकूण २ लाख ६५ हजार रुपयांचा मुद्देमाल हस्तगत करण्यात आला.
तपासात आरोपींनी हिंजवडी, तळेगाव दाभाडे, विश्रांतवाडी तसेच बिदर ग्रामीण पोलीस ठाण्याच्या हद्दीतही गुन्हे केल्याचे उघड झाले आहे. आदित्य मनलोर याच्याविरुद्ध यापूर्वी मोबाईल स्नॅचिंग आणि चैन स्नॅचिंगचे सहा गुन्हे दाखल असल्याची माहिती पोलिसांनी दिली.
ही कारवाई सहायक पोलीस निरीक्षक संदीप देशमुख, पोलीस उपनिरीक्षक राहुल खिळे, संतोष कोळगे, आशिष बोटके, गोविंद चव्हाण, विनायक मराठे, प्रदीप गायकवाड, अजित बेंडभर, सौदागर लामतुरे, विनोद कदम व निखील कपले यांच्या पथकाने केली.
पोलीस आयुक्त विनयकुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, बसवराज तेली, पोलीस उपआयुक्त प्रदीप जाधव तसेच सहाय्यक पोलीस आयुक्त सुनील कुराडे यांच्या मार्गदर्शनाखाली ही उल्लेखनीय कारवाई करण्यात आली.
About the Author
