नियमभंगाविरुद्ध कठोर कारवाई करणाऱ्या अमित डोळस यांना बदनाम करण्याचा प्रयत्न?

वाहतूक नियम मोडणाऱ्यावर दंडात्मक कारवाई; सोशल मीडियावर अपप्रचार केल्याप्रकरणी तक्रार

काशिनाथ शिंदे | पिंपरी 

पिंपरी वाहतूक विभागाचे प्रभारी अधिकारी अमित डोळस यांनी वाहतूक नियमांची प्रभावी अंमलबजावणी करत नियमभंग करणाऱ्यांवर कारवाई सुरू ठेवली असताना, त्यांना बदनाम करण्याचा प्रयत्न झाल्याचा प्रकार समोर आला आहे. वाहतूक नियमांचे उल्लंघन करणाऱ्या एका वाहनचालकावर कारवाई केल्यानंतर संबंधित व्यक्तीने सोशल मीडियावर आक्षेपार्ह पोस्ट आणि व्हिडीओ प्रसारित करून डोळस यांची प्रतिमा मलिन करण्याचा प्रयत्न केल्याची तक्रार दाखल करण्यात आली आहे.

मिळालेल्या माहितीनुसार, पिंपरी वाहतूक विभागाचे प्रभारी अधिकारी अमित डोळस हे १३ मे २०२६ रोजी कार्यालयीन कामकाज करत असताना विभागासमोर काळ्या फिल्म लावलेल्या वाहनाची नोंद झाली. चौकशीदरम्यान संबंधित वाहन हे अॅड. प्रज्वल दुबे यांचे असल्याचे समोर आले. वाहनावर नियमबाह्य काळी फिल्म आढळून आल्याने मोटार वाहन कायद्यानुसार ई-चलनद्वारे दंडात्मक कारवाई करण्यात आली.

तक्रारीनुसार, कारवाईदरम्यान संबंधित व्यक्तीने आपण माहिती अधिकार कार्यकर्ता असल्याचे सांगत कारवाईस विरोध केला. मात्र, नियम सर्वांसाठी समान असल्याची भूमिका घेत अमित डोळस यांनी कायदेशीर कारवाई करण्याचे निर्देश दिले. त्यानंतर संबंधित व्यक्तीने मोबाईलवर चित्रीकरण करून तसेच व्हॉट्सॲप स्टेटस आणि फेसबुकवर काही पोस्ट प्रसारित करून डोळस यांच्याबाबत अपमानास्पद व बदनामीकारक मजकूर प्रसिद्ध केल्याचा आरोप आहे.

या प्रकरणी दाखल केलेल्या निवेदनात, वाहतूक शिस्तीची काटेकोर अंमलबजावणी करणाऱ्या अधिकाऱ्याला लक्ष्य करून वैयक्तिक बदनामी करण्यात आल्याचे नमूद करण्यात आले आहे. यासंदर्भात संबंधित व्यक्तीविरुद्ध भारतीय न्याय संहितेच्या लागू कलमांनुसार तक्रार दाखल करण्यात आली असून पुढील तपास सुरू आहे.

शहरातील वाहतूक व्यवस्थेत शिस्त निर्माण करण्यासाठी आणि नियमभंग करणाऱ्यांवर निर्भीडपणे कारवाई करण्यासाठी अमित डोळस हे ओळखले जातात. कोणताही दबाव न मानता कायद्याची अंमलबजावणी करण्याची त्यांची भूमिका यामुळेच चर्चेत असते. या प्रकरणामुळे नियमांची अंमलबजावणी करणाऱ्या अधिकाऱ्यांना सोशल मीडियाच्या माध्यमातून लक्ष्य करण्याच्या वाढत्या प्रवृत्तीवरही प्रश्नचिन्ह निर्माण झाले आहे.

दरम्यान याबाबत अॅड. प्रज्वल दुबे यांची प्रतिक्रिया मिळू शकली नाही. ती प्राप्त झाल्यास बातमीत सामाविष्ट केली जाईल.