सिद्धीविनायक पब्लिक स्कूलमध्ये उत्साहात प्रवेशोत्सव; नवागत विद्यार्थ्यांचे गुलाबपुष्पांनी स्वागत

काशिनाथ शिंदे/पिंपरी 

नवीन शैक्षणिक वर्षाच्या प्रारंभी विद्यार्थ्यांचे स्वागत संस्मरणीय करण्यासाठी सिद्धीविनायक पब्लिक स्कूलमध्ये प्रवेशोत्सवाचे आयोजन करण्यात आले. शाळेचा पहिला दिवस आनंद, उत्साह आणि उत्सुकतेच्या वातावरणात पार पडला. शाळा परिसर आकर्षक फुलांची सजावट, विविध रंगांच्या रांगोळ्या आणि बलूनच्या तोरणांनी सजविण्यात आला होता.

शाळेत येणाऱ्या प्रत्येक विद्यार्थ्याचे औक्षण करून तसेच गुलाबपुष्प देऊन स्वागत करण्यात आले. त्यामुळे विद्यार्थ्यांमध्ये विशेष उत्साहाचे वातावरण निर्माण झाले. या प्रसंगी मोठ्या संख्येने पालक उपस्थित होते. विद्यार्थ्यांच्या स्वागतासाठी शिक्षक व शिक्षकेतर कर्मचारीही उत्साहाने सहभागी झाले होते.

कार्यक्रमात संस्थेच्या अध्यक्षा   निर्मला जाधव आणि सचिव  मारुती जाधव यांनी विद्यार्थ्यांना गुलाबपुष्प देऊन नवीन शैक्षणिक वर्षासाठी शुभेच्छा दिल्या. शिक्षणाबरोबरच विद्यार्थ्यांच्या सर्वांगीण विकासासाठी शाळा कटिबद्ध असल्याचे त्यांनी यावेळी सांगितले.

या आगळ्यावेगळ्या स्वागतामुळे नवागत विद्यार्थ्यांचा शाळेतील पहिला दिवस संस्मरणीय ठरला. विद्यार्थीही मोठ्या आनंदाने कार्यक्रमात सहभागी झाले आणि नव्या शैक्षणिक वर्षाची उत्साहात सुरुवात झाली.