DakshTimes News Network
काशिनाथ शिंदे : नागपूर
हायर परचेस नोंदणी-बोजाउतरवणीची कामेही रखडली; हजारो वाहनचालक-मालकांना फटका
नागपूर : महाराष्ट्रातील वाहन हस्तांतरणाची प्रक्रिया गेल्या तीन आठवड्यांपासून पूर्णपणे ठप्प असल्याने हजारो वाहनचालक व वाहनमालकांची कामे रखडली आहेत. वाहन हस्तांतरणासह हायर परचेस नोंदणी आणि हायर परचेस बोजाउतरवणीची कामेही बंद असल्याने नागरिकांना मोठ्या अडचणींचा सामना करावा लागत आहे. या गंभीर प्रश्नावर तातडीने मार्ग काढण्याची मागणी करत महाराष्ट्र राज्य चालक-मालक प्रतिनिधी महासंघ आणि मोटार ड्रायव्हिंग स्कूल ओनर्स असोसिएशनच्या पदाधिकाऱ्यांनी केंद्रीय परिवहनमंत्री नितीन गडकरी यांची प्रत्यक्ष भेट घेऊन निवेदन दिले.
गेल्या तीन आठवड्यांपासून संपूर्ण महाराष्ट्रात वाहन हस्तांतरणाची प्रक्रिया ठप्प असल्याने वाहन खरेदी-विक्री व्यवहारांवर त्याचा थेट परिणाम झाला आहे. तसेच हायर परचेस नोंदवणे आणि बोजा उतरवण्याची प्रक्रिया बंद असल्यामुळे वाहनधारक, चालक, मालक तसेच संबंधित व्यवसायिकांची मोठी गैरसोय होत आहे.
या समस्येची तातडीने दखल घेऊन संबंधित विभागाला आवश्यक निर्देश द्यावेत आणि वाहन हस्तांतरणासह हायर परचेस नोंदणी व बोजाउतरवणीची प्रक्रिया त्वरित पूर्ववत करावी, अशी मागणी निवेदनाद्वारे करण्यात आली.
महाराष्ट्र राज्य चालक-मालक प्रतिनिधी महासंघाचे सर्वेसर्वा बाबासाहेब शिंदे, मोटार ड्रायव्हिंग स्कूल ओनर्स असोसिएशन महाराष्ट्र राज्याचे अध्यक्ष राजू घाटोळे, महासंघाचे पदाधिकारी बापू भावे, विक्रांत विरंगुळकर, निलेश ढवळे, मोटार ड्रायव्हिंग स्कूल ओनर्स असोसिएशनचे प्रसिद्धीप्रमुख विनोद वरखडे आणि सोशल मीडिया प्रमुख सुरज देवकर यावेळी उपस्थित होते.
“हजारो वाहनचालक-मालकांची रोजीरोटी आणि नागरिकांची महत्त्वाची कामे वाहन हस्तांतरण प्रक्रियेवर अवलंबून आहेत. त्यामुळे हा तांत्रिक अथवा प्रशासकीय अडथळा तातडीने दूर करून महाराष्ट्रातील वाहन व्यवहार सुरळीत करावेत,” अशी भूमिका प्रतिनिधींनी केंद्रीय मंत्र्यांसमोर मांडली.
