DakshTimes News Network
काशिनाथ शिंदे
पिंपरी : अमली पदार्थ तस्करीविरोधात पिंपरी पोलिसांनी धडाकेबाज कारवाई करत ७ लाख ७४ हजार रुपये किमतीची १५४.८ ग्रॅम एमडी पावडर जप्त केली. या कारवाईत एका आरोपीला अटक करण्यात आली असून, त्याच्याकडून ३ लाख ५० हजार रुपये किमतीची मारुती सेलेरिओ कारही पोलिसांनी ताब्यात घेतली.
अशोक गणपत गायकवाड (वय ४०, रा. इंद्रायणी कॉलनी, कामशेत, ता. मावळ, जि. पुणे) असे अटक केलेल्या आरोपीचे नाव आहे.
पोलिसांनी दिलेल्या माहितीनुसार, १९ ऑगस्ट रोजी सायंकाळी सव्वासहा वाजण्याच्या सुमारास जुन्या मुंबई-पुणे महामार्गावरील सर्व्हिस रोडच्या मध्यभागी सुरू असलेल्या मेट्रो पुलाखाली, अग्रसेन भवनसमोर, मोहननगर, चिंचवड येथे ही कारवाई करण्यात आली.
गायकवाड याच्याकडून १५४.८ ग्रॅम निव्वळ वजनाची एमडी पावडर आढळून आली. पॉलीथीन पिशवीसह तिचे एकूण वजन १५९.७८ ग्रॅम असल्याचे पोलिसांनी सांगितले. अमली पदार्थ विक्रीच्या उद्देशाने बेकायदेशीररीत्या बाळगल्याचा आरोप त्याच्यावर आहे.
तसेच आरोपीच्या ताब्यात असलेली एमएच १४ ईसी ९४४६ क्रमांकाची सिल्वर रंगाची मारुती सेलेरिओ कार पोलिसांनी जप्त केली.
याप्रकरणी पिंपरी पोलीस ठाण्यात गुन्हा रजिस्टर क्रमांक ५६०/२०२६ नुसार एनडीपीएस कायदा कलम ८(क), २१(क) अन्वये गुन्हा दाखल करण्यात आला आहे. पुढील तपास सपोनि अतिग्रे करीत आहेत.
चिंचवडमध्ये एमडीचा साठा सापडल्याने अमली पदार्थ तस्करीचे जाळे पुन्हा चर्चेत आले असून, या प्रकरणाच्या पुढील तपासात आणखी कोणाचे धागेदोरे समोर येतात, याकडे पोलिसांचे लक्ष लागले आहे.
