DakshTimes News Network
मोशीतील गंधर्व फेज-२ सोसायटीतून तडीपार आरोपी ताब्यात; चिखली व एमआयडीसी भोसरी पोलिसांच्या ताब्यात सुपूर्द
काशिनाथ शिंदे
पिंपरी-चिंचवड : तडीपार आदेश झुगारून पिंपरी-चिंचवड शहरात वावरत असलेल्या तीन आरोपींच्या मुसक्या आवळण्यात गुन्हे शाखा युनिट-३च्या पथकाला यश आले आहे. गुप्त माहितीच्या आधारे पोलिसांनी मोशी येथील गंधर्व फेज-२ सोसायटीत कारवाई करत तिघांना ताब्यात घेतले.
गुन्हे शाखा युनिट-३चे पोलीस अंमलदार बाबासाहेब गर्जे, सोमनाथ बोऱ्हाडे, अजित रुपनवर, सुंदर थोरात आणि स्वप्निल महाले हे पाहिजे, फरारी तसेच तडीपार आरोपींचा शोध घेत होते. त्यावेळी गुप्त बातमीदारामार्फत चिखली आणि एमआयडीसी भोसरी पोलीस ठाण्याच्या अभिलेखावरील तडीपार आरोपी मोशी परिसरात असल्याची माहिती मिळाली.
मिळालेल्या माहितीनुसार पोलिसांनी गंधर्व फेज-२ सोसायटी, मोशी येथे सापळा रचून आदर्श उर्फ डपक्या गौतम खंडारे (वय २०, रा. जाधववाडी, चिखली), व्हीपी उर्फ विशाल हनुमंत पोळ (वय २१, रा. जाधववाडी, चिखली) आणि जीके उर्फ गणेश संतोष कोठावळे (वय १९, रा. जाधववाडी, चिखली) या तिघांना ताब्यात घेतले.
यातील आदर्श खंडारे हा चिखली पोलीस ठाण्याच्या अभिलेखावरील, तर विशाल पोळ आणि गणेश कोठावळे हे एमआयडीसी भोसरी पोलीस ठाण्याच्या अभिलेखावरील तडीपार आरोपी असल्याची माहिती पोलिसांनी दिली.
तिघांची वैद्यकीय तपासणी करून पुढील कायदेशीर कारवाईसाठी त्यांना एमआयडीसी भोसरी पोलीस ठाण्याच्या ताब्यात देण्यात आले आहे.
ही कारवाई वरिष्ठ पोलीस निरीक्षक संतोष कसबे यांच्या मार्गदर्शनाखाली गुन्हे शाखा युनिट-३च्या पथकाने केली. तडीपार आरोपी शहरात पुन्हा सक्रिय होऊ नयेत, यासाठी गुन्हे शाखेकडून अशा आरोपींवर बारकाईने लक्ष ठेवण्यात येत आहे.
