DakshTimes News Network
हायड्रोपोनिक गांजा आणि एमडीसह दोघे जेरबंद; एनडीपीएस कायद्यान्वये गुन्हे दाखल
काशिनाथ शिंदे
पुणे शहरातील अमली पदार्थांच्या तस्करीविरोधात कोंढवा पोलिसांनी धडक कारवाई सुरू ठेवली असून, अवघ्या ४८ तासांत दोन स्वतंत्र कारवाया करत हायड्रोपोनिक गांजा आणि एमडी (मेफेड्रोन) असा सुमारे ८ लाख १३ हजार रुपयांचा मुद्देमाल जप्त केला. या कारवाईत दोन आरोपींना अटक करण्यात आली असून, त्यांच्याविरुद्ध एनडीपीएस कायद्यान्वये गुन्हे दाखल करण्यात आले आहेत.
पहिली कारवाई ३१ ऑगस्ट २०२६ रोजी कोंढवा येथील अजमेरा पार्क परिसरातील एल.के. अपार्टमेंटसमोर करण्यात आली. संशयास्पदरीत्या थांबलेल्या अमीर अकबर शेख (वय ३६) याला पोलिसांनी ताब्यात घेतले. त्याची झडती घेतली असता १४९ ग्रॅम हायड्रोपोनिक गांजा आढळून आला. त्याच्याकडून रोख रक्कम, एक वाहन, इलेक्ट्रॉनिक वजनकाटा आणि प्लास्टिकच्या पिशव्या असा एकूण ५ लाख ४९ हजार रुपयांचा मुद्देमाल जप्त करण्यात आला.
दरम्यान, त्यापूर्वी २८ ऑगस्ट २०२६ रोजी कोंढवा परिसरातील ‘पॅराडाईज इन लॉज’च्या रूम क्रमांक ४०५ वर पोलिसांनी छापा टाकला. या कारवाईत अजीम सलीम शेख (वय ३७) याला ताब्यात घेण्यात आले. त्याच्याकडून १२.१० ग्रॅम एमडी (मेफेड्रोन) पावडर, रोख रक्कम, दोन मोबाईल फोन आणि इंजेक्शनच्या सिरिंज असा सुमारे २ लाख ६४ हजार रुपयांचा मुद्देमाल हस्तगत करण्यात आला.
दोन्ही कारवायांमध्ये पोलिसांनी अमली पदार्थांचा साठा जप्त करत आरोपींविरुद्ध एनडीपीएस कायद्यानुसार गुन्हे दाखल केले आहेत. कोंढवा परिसरात अमली पदार्थांची विक्री व तस्करी करणाऱ्यांवर पोलिसांकडून कारवाईचा बडगा उगारण्यात आल्याने ड्रग्ज तस्करांचे धाबे दणाणले आहेत.
अवघ्या ४८ तासांत दोन कारवाया आणि लाखोंचा मुद्देमाल जप्त झाल्याने कोंढवा पोलिसांच्या अमली पदार्थविरोधी मोहिमेला वेग आल्याचे दिसून येत आहे.
