DakshTimes News Network
२०२४-२५ किंवा २०२५-२६ या आर्थिक वर्षातील उत्पन्नाचा दाखला सादर करता येणार
काशिनाथ शिंदे: पुणे
पुणे गृहनिर्माण व क्षेत्रविकास मंडळाच्या १५ टक्के सामाजिक आणि २० टक्के सर्वसमावेशक गृहनिर्माण योजनांमधील सदनिकांच्या वितरणासाठी अर्ज करणाऱ्या नागरिकांना दिलासा देण्यात आला आहे. अर्जदारांच्या अडचणी लक्षात घेऊन आता मागील दोन आर्थिक वर्षांपैकी कोणत्याही एका वर्षाचे उत्पन्न ग्राह्य धरण्याचा निर्णय मंडळाने घेतला आहे.
या संदर्भातील जाहिरात २४ ऑगस्ट २०२६ रोजी प्रसिद्ध करण्यात आली असून, त्याच दिवशी दुपारी १२ वाजल्यापासून ऑनलाइन अर्ज भरण्यास सुरुवात झाली आहे. अर्जदारांनी उत्पन्नाचा पुरावा म्हणून तहसीलदार कार्यालयाकडून प्राप्त उत्पन्नाचा दाखला किंवा आयकर विवरणपत्र ऑनलाइन पद्धतीने सादर करणे बंधनकारक आहे.
यापूर्वी मंडळाने आर्थिक वर्ष २०२५-२६ मधील उत्पन्नाचा दाखला किंवा आयकर विवरणपत्र सादर करण्याचे आवाहन केले होते. मात्र, अनेक अर्जदारांनी २०२५-२६ या आर्थिक वर्षाचे आयकर विवरणपत्र भरले असले तरी ते अलीकडील असल्यामुळे आयकर विभागाकडून त्याचे प्रमाणपत्र पडताळणीसाठी उपलब्ध होण्यास विलंब होत आहे. परिणामी ऑनलाइन अर्ज भरताना अर्जदारांना अडचणींचा सामना करावा लागत होता.
ही बाब लक्षात घेऊन मंडळाने उत्पन्न निकषात शिथिलता देण्याचा निर्णय घेतला आहे. त्यानुसार आर्थिक वर्ष २०२४-२५ किंवा २०२५-२६ यापैकी कोणत्याही एका वर्षाचे उत्पन्न अर्जासाठी ग्राह्य धरले जाणार आहे.
अर्जदारांनी या बदलाची नोंद घेऊन उपलब्ध कागदपत्रांनुसार अर्ज प्रक्रिया पूर्ण करावी, असे आवाहन पुणे गृहनिर्माण व क्षेत्रविकास मंडळाचे सभापती शिवाजी आढळराव पाटील यांनी केले आहे.
