DakshTimes News Network
भोसरी-मोशी परिसरात अंमली पदार्थ विरोधी पथकाची धडक कारवाई; ७१.७२० ग्रॅम एमडी, १०८.७३० ग्रॅम अफीमसह ४.३० लाखांचा मुद्देमाल जप्त
काशिनाथ शिंदे
पिंपरी-चिंचवड, शहरात अंमली पदार्थांची अवैध विक्री आणि तस्करी करणाऱ्यांविरोधात पिंपरी-चिंचवड पोलिसांनी कारवाईची मोहीम अधिक तीव्र केली आहे. अंमली पदार्थ विरोधी पथकाने मोशी परिसरात सापळा रचून एमडी (मेफेड्रॉन) आणि अफीम तस्करी करणाऱ्या दोघांना बेड्या ठोकल्या. या कारवाईत तब्बल ७१.७२० ग्रॅम एमडी आणि १०८.७३० ग्रॅम अफीम, दोन मोबाईल, डिजिटल वजनकाटा आणि दुचाकीसह एकूण ४ लाख ३० हजार २५ रुपयांचा मुद्देमाल जप्त करण्यात आला.
अटक करण्यात आलेल्या आरोपींची नावे आकाश कुमार भेराराम बिश्नोई (वय २१, रा. दुर्गापार्क, सस्तेवाडी, मोशी, मूळ राजस्थान) आणि प्रविण कुमार हिराराम बिश्नोई अशी आहेत.
पोलिसांनी दिलेल्या माहितीनुसार, अंमली पदार्थ विरोधी पथक शहरात गस्त घालत असताना पोलीस हवालदार विजय दौंडकर यांना एमडी व अफीम तस्करीबाबत गोपनीय माहिती मिळाली. या माहितीची खातरजमा करून पोलिसांनी ३ सप्टेंबर रोजी सायंकाळी सव्वासहा वाजण्याच्या सुमारास देहू-मोशी रोडवरील बोराटेवस्ती, मोशी येथील महालक्ष्मी फर्निचर दुकानासमोर सापळा रचला.
पोलिसांनी संशयित हालचालींवर लक्ष ठेवत कारवाई केली असता आकाश बिश्नोई याच्याकडून ७१.७२० ग्रॅम एमडी, तर प्रविण बिश्नोई याच्याकडून १०८.७३० ग्रॅम अफीम हस्तगत करण्यात आले. दोघेही अंमली पदार्थ विक्रीच्या उद्देशाने बेकायदेशीररीत्या अंमली पदार्थ बाळगत व वाहतूक करीत असल्याचे तपासात निष्पन्न झाले.
या प्रकरणी दोन्ही आरोपींविरोधात पिंपरी पोलीस ठाण्यात एनडीपीएस कायद्यानुसार कलम ८(क), १७(ब), २२(क) आणि २९ अन्वये गुन्हा दाखल करण्यात आला आहे. आरोपींना अंमली पदार्थांचा पुरवठा कुठून होत होता, तसेच या तस्करीच्या साखळीत आणखी कोणाचा सहभाग आहे का, याचा पोलीस तपास करीत आहेत.
ही धडक कारवाई पोलीस आयुक्त विनयकुमार चौबे यांच्या मार्गदर्शनाखाली, गुन्हे शाखेचे पोलीस उपायुक्त रोहिदास पवार, सहायक पोलीस आयुक्त सचिन कदम आणि वरिष्ठ पोलीस निरीक्षक संतोष पाटील यांच्या नेतृत्वाखालील पथकाने केली.
नागरिकांनी माहिती देण्याचे पोलिसांचे आवाहन
शहरात अंमली पदार्थांची विक्री, साठवणूक किंवा तस्करी सुरू असल्याची माहिती मिळाल्यास नागरिकांनी ७७९८१००११२ या क्रमांकावर संपर्क साधावा, असे आवाहन पोलिसांनी केले आहे. माहिती देणाऱ्याचे नाव पूर्णपणे गोपनीय ठेवण्यात येणार असल्याचेही पोलिसांनी स्पष्ट केले आहे.
