DakshTimes News Network
जिल्हा खनिज प्रतिष्ठान, पुणेच्या नियामक परिषदेत पदसिद्ध सदस्य म्हणून नियुक्ती
काशिनाथ शिंदे
पिंपरी, चिंचवड विधानसभा मतदारसंघाचे आमदार शंकर जगताप यांची जिल्हा खनिज प्रतिष्ठान (डीएमएफ), पुणेच्या नियामक परिषदेवर पदसिद्ध सदस्य म्हणून नियुक्ती करण्यात आली आहे. जिल्हाधिकारी कार्यालयाच्या खनिकर्म शाखेने याबाबतचे अधिकृत नियुक्तिपत्र जारी केले आहे.
महाराष्ट्र शासनाच्या उद्योग, ऊर्जा, कामगार व खनिकर्म विभागाने ५ ऑगस्ट २०२६ रोजी जारी केलेल्या शासन निर्णयानुसार तसेच ११ ऑक्टोबर २०२४ रोजीच्या अधिसूचनेतील तरतुदींनुसार ही नियुक्ती करण्यात आली आहे.
जिल्हा खनिज प्रतिष्ठानच्या नियामक परिषदेवर खाणकामामुळे बाधित भाग आणि तेथील नागरिकांच्या सर्वांगीण विकासासाठी धोरणात्मक निर्णय घेण्याची महत्त्वपूर्ण जबाबदारी असते. प्रतिष्ठानचा वार्षिक कृती आराखडा व अर्थसंकल्प मंजूर करणे, विविध विकासकामांना मान्यता देणे, निधीचा योग्य व पारदर्शक वापर सुनिश्चित करणे, तसेच मंजूर कामांचा वेळोवेळी आढावा घेणे, ही परिषदेची प्रमुख जबाबदारी आहे.
याशिवाय प्रतिष्ठानच्या वार्षिक अहवालासह लेखापरीक्षित खात्यांना मंजुरी देणे, निधीच्या विनियोगावर देखरेख ठेवणे आणि खनिजबाधित नागरिकांच्या गरजांनुसार विकासकामांना प्राधान्य देणे, अशी महत्त्वाची भूमिका नियामक परिषद पार पाडते.
या नियुक्तीमुळे खनिजबाधित भागातील मूलभूत सुविधा, आरोग्य, शिक्षण आणि पर्यावरण संवर्धनाच्या कामांना अधिक प्रभावी दिशा मिळण्याची अपेक्षा व्यक्त केली जात आहे.
जिल्हा खनिज अधिकारी तथा सदस्य सचिव आनंद पाटील यांनी जिल्हाधिकाऱ्यांच्या मान्यतेने आमदार शंकर जगताप यांना नियुक्तिपत्र दिले आहे.
“जबाबदारी प्रामाणिकपणे पार पाडणार”
“जिल्हा खनिज प्रतिष्ठान, पुणेच्या नियामक परिषदेवर पदसिद्ध सदस्य म्हणून मिळालेली जबाबदारी प्रामाणिकपणे पार पाडणार आहे. खनिजबाधित भागातील नागरिकांच्या मूलभूत सुविधा, आरोग्य, शिक्षण आणि पर्यावरण संवर्धनासाठी उपलब्ध निधीचा योग्य व पारदर्शक वापर व्हावा, यासाठी प्राधान्याने प्रयत्न करेन.”
