DakshTimes News Network
पत्रकारिता, साहित्य आणि सामाजिक क्षेत्रातील योगदानाची अखेर; वयाच्या ८१व्या वर्षी निधन
काशिनाथ शिंदे
पिंपरी पिंपरी-चिंचवड शहरातील ज्येष्ठ पत्रकार, लेखक आणि सामाजिक कार्यकर्ते शिवाजीराव अमृतराव शिर्के (वय ८१) यांचे मंगळवारी (दि. १५ सप्टेंबर) निधन झाले. त्यांच्या निधनाने पत्रकारिता, साहित्य आणि सामाजिक क्षेत्रात हळहळ व्यक्त होत आहे.
शिवाजीराव शिर्के यांनी पुणे जिल्हा गुणवंत कामगार विकास समिती, पिंपरी-चिंचवड पत्रकार संघ आणि फुगेवाडी ज्येष्ठ नागरिक संघ आदी संस्थांचे अध्यक्षपद भूषविले होते. विविध सामाजिक आणि साहित्यिक उपक्रमांमध्ये त्यांचा सक्रिय सहभाग होता.
शिर्के यांनी ‘प्रवीण प्रकाशन’ या संस्थेच्या माध्यमातून साहित्य क्षेत्रातही उल्लेखनीय योगदान दिले. त्यांनी लिहिलेल्या ‘महाराणी येसूबाई यांचा इतिहास’ या पुस्तकाला ‘इंडिया बुक ऑफ रेकॉर्ड’चा पुरस्कार मिळाला. तसेच ‘राजे शिर्के घराण्याचा इतिहास’, ‘कृष्णाकाठ ते पवनाकाठ’ हे आत्मचरित्र, ‘कालभैरव’, ‘शिरकाण’ यांसह अनेक पुस्तके आणि कवितासंग्रह प्रकाशित झाले आहेत.
सातारा जिल्ह्यातील उद्योजकांचा परिचय करून देणारे ‘सातारचे रत्न’ हे त्यांचे पुस्तकही विशेष गाजले. याशिवाय ‘पराचा कावळा’, ‘ही पैशाची किमया’ आदी नाटकांचे लेखनही त्यांनी केले.
शिवाजीराव शिर्के यांच्या पश्चात पत्नी, एक मुलगा, दोन विवाहित मुली, जावई आणि नातवंडे असा परिवार आहे. पिंपरी-चिंचवड पत्रकार संघाचे अध्यक्ष प्रवीण शिर्के यांचे ते वडील, तर ओबीसी कल्याण विभागाचे सहसंचालक प्रशांत शामराव शिर्के यांचे चुलते होत.
अंत्यविधी बुधवारी
शिवाजीराव शिर्के यांचा अंत्यविधी बुधवारी (दि. १६ सप्टेंबर) सकाळी १०.३० वाजता फुगेवाडी स्मशानभूमी येथे होणार आहे.
