DakshTimes News Network
काशिनाथ शिंदे
पुणे : भ्रष्टाचारासंदर्भातील तक्रारींची गांभीर्याने दखल घेत पुणे विभागीय भ्रष्टाचार निर्मूलन समितीच्या तिमाही बैठकीत पुणे जिल्ह्यातील दोन प्रकरणांवर सुनावणी घेण्यात आली. विभागीय आयुक्त शीतल तेली उगले यांच्या अध्यक्षतेखाली ही बैठक पार पडली.
बैठकीत मागील तीन महिन्यांच्या कालावधीत समितीकडे प्राप्त झालेल्या भ्रष्टाचाराच्या तक्रारी तसेच त्यावर संबंधित विभागांकडून करण्यात आलेल्या उपाययोजनांचा आढावा घेण्यात आला. तक्रारदारांनी मांडलेल्या मुद्द्यांची माहिती घेऊन संबंधित विभागांच्या अधिकाऱ्यांकडूनही वस्तुस्थिती जाणून घेण्यात आली.
या वेळी अर्जदार तसेच संबंधित विभागाच्या अधिकाऱ्यांना आपापले म्हणणे मांडण्याची संधी देण्यात आली. त्यानंतर विभागीय आयुक्त शीतल तेली उगले यांनी दोन्ही प्रकरणांवर सुनावणी घेतली.
बैठकीस कोल्हापूर परिक्षेत्राचे विशेष पोलीस महानिरीक्षक रंजन कुमार शर्मा, अपर आयुक्त तुषार ठोंबरे, समितीचे सदस्य सचिव तथा लाचलुचपत प्रतिबंधक विभागाचे प्रभारी पोलीस अधीक्षक अजित पाटील यांच्यासह विविध विभागांचे अधिकारी उपस्थित होते.
भ्रष्टाचाराच्या तक्रारींची दखल घेऊन त्यावर आवश्यक कार्यवाही करण्यासाठी विभागीय स्तरावर दर तीन महिन्यांनी भ्रष्टाचार निर्मूलन समितीची बैठक घेण्यात येते. प्रत्येक तीन महिन्यांत संबंधित महिन्याच्या दुसऱ्या सोमवारी ही बैठक आयोजित केली जाते. या माध्यमातून तक्रारींचा नियमित आढावा घेऊन संबंधित प्रकरणांवर आवश्यक उपाययोजना करण्याची कार्यवाही केली जाते.
