DakshTimes News Network
गुन्हे शाखा युनिट-३ची दमदार कामगिरी; छत्रपती संभाजीनगरातून आरोपी ताब्यात
काशिनाथ शिंदे
पिंपरी : चाकण दक्षिण पोलिस ठाण्याच्या हद्दीतील मोहितेवाडी-शेलपिंपळगाव येथे झालेल्या घरफोडीच्या गुन्ह्याचा गुन्हे शाखा युनिट-३ने छडा लावला. पोलिसांनी छत्रपती संभाजीनगर येथून एका आरोपीला ताब्यात घेतले असून, चोरीच्या सोन्याच्या मोबदल्यातून त्याच्या वाट्याला आलेली दोन लाख रुपयांची रोकड जप्त केली आहे.
मोहितेवाडी-शेलपिंपळगाव, ता. खेड येथे राहणारे अमोल एकनाथ पोतले (वय ३२) यांच्या घराच्या मुख्य दरवाजाची कडी व कुलूप तोडून चोरट्यांनी घरात प्रवेश केला होता. घरातील कपाटाचे लॉक उचकटून सोन्याचे दागिने चोरी करण्यात आले. ही घटना २४ जुलै २०२६ रोजी घडली. याप्रकरणी चाकण दक्षिण पोलिस ठाण्यात गुन्हा दाखल करण्यात आला होता.
गुन्ह्याचा तपास सुरू असताना गुन्हे शाखा युनिट-३च्या पथकाने घटनास्थळावरील सीसीटीव्ही चित्रणाच्या आधारे आरोपीचा शोध सुरू केला. सुमारे दीड महिन्यापासून पोलिसांकडून आरोपीचा कसून शोध घेतला जात होता. तपासादरम्यान पोलिस हवालदार सोनवणे यांना मिळालेल्या गोपनीय माहितीतून फिलीप नादर चव्हाण (वय ३३, रा. चिंचोळी पाटील, ता. जि. अहिल्यानगर) याच्याबाबत माहिती मिळाली.
फिलीप चव्हाण हा छत्रपती संभाजीनगर येथे असल्याची माहिती मिळताच पोलिस पथकाने तेथे जाऊन त्याला ताब्यात घेतले. चौकशीत त्याने गुन्ह्याची कबुली दिल्याचे पोलिसांनी सांगितले. तसेच त्याचा साथीदार छगन चिंतामण काळे (रा. कडा, आष्टी, ता. जि. बीड) याच्यासोबत मिळून चाकण-मोहितेवाडी परिसरात घरफोडी केल्याची माहिती त्याने दिली.
चोरीच्या मालाबाबत चौकशी केली असता, सोन्याच्या मोबदल्यातून मिळालेल्या रकमेतून आरोपीच्या वाट्याला आलेली दोन लाख रुपयांची संपूर्ण रोकड त्याच्याकडून जप्त करण्यात आली.
या गुन्ह्याचा पुढील तपास चाकण दक्षिण पोलिस ठाण्याचे पोलिस करीत आहेत.
ही कारवाई पोलिस आयुक्त विनय कुमार चौबे, सहपोलिस आयुक्त डॉ. शशिकांत महावारकर, अपर पोलिस आयुक्त सारंग आवाड, पोलिस उपआयुक्त (गुन्हे) रोहिदास पवार, सहायक पोलिस आयुक्त (गुन्हे) डॉ. सुदर्शन राठोड यांच्या मार्गदर्शनाखाली करण्यात आली.
गुन्हे शाखा युनिट-३चे वरिष्ठ पोलिस निरीक्षक संतोष कसबे, पोलिस उपनिरीक्षक जावळे, गोसावी, तसेच पोलिस अंमलदार सोनवणे, भोरेरे, इचके, सावळे, खेडकर, गुंजाळ, राळे, दांगट आणि थोरात यांच्या पथकाने ही कारवाई केली.
