DakshTimes News Network
वैभव नगरमध्ये विसर्जन मिरवणुकीतील ट्रॉलीवरील सजावट अचानक कोसळली; नागरिकांना वेळीच केले सुरक्षित
काशिनाथ शिंदे
पिंपरी :गणपती विसर्जन मिरवणुकीदरम्यान वैभव नगर येथे ट्रॉलीवरील भव्य सजावटीचे साहित्य अचानक मागील बाजूस कोसळल्याची घटना घडली. मात्र, बंदोबस्तावर तैनात असलेल्या पोलिसांनी प्रसंगावधान राखत तत्काळ नागरिकांना सुरक्षित ठिकाणी हलविल्याने संभाव्य मोठी दुर्घटना टळली. सुदैवाने या घटनेत कोणतीही जीवितहानी झाली नाही तसेच कोणत्याही वाहनाचे नुकसान झाले नाही.
गणपती विसर्जन करून मिरवणूक पवनेश्वर मंदिराच्या दिशेने जात असताना इंडियन ऑइल पेट्रोल पंपासमोर ट्रॉलीवरील सजावट अचानक मागील बाजूस कोसळण्यास सुरुवात झाली. त्यावेळी बंदोबस्तावर असलेले मपोहवा १८२४ आनंदकर, मपोहवा ३०९५ माकोडे, पोलीस कॉन्स्टेबल २०२८ बन्ने, लोकरक्षक पोलीस कॉन्स्टेबल २६१३ पवळ, राखीव पोलीस कॉन्स्टेबल ५७२ चौधरी, वार्डन मराठे आणि वार्डन कोकणे यांनी क्षणाचाही विलंब न करता परिस्थिती हाताळली.
पोलिसांनी तत्काळ घटनास्थळी उपस्थित नागरिकांना बाजूला केले. ट्रॉलीच्या मागील बाजूस असलेली वाहने सुरक्षित ठिकाणी हलविण्यात आली. तसेच रस्त्याने ये-जा करणाऱ्या पादचाऱ्यांनाही बाजूला करून सुरक्षित अंतरावर थांबविण्यात आले. नागरिकांना सुरक्षित केल्यानंतर ट्रॉलीवरील सजावटीचे साहित्य रस्त्यावर कोसळले.
घटनेनंतर पोलिसांनी तत्काळ रस्त्यावर पडलेले सजावटीचे साहित्य बाजूला करून वाहतूक सुरळीत केली. प्राथमिक माहितीनुसार, सदर गणेश मंडळ लाल बहादूर शास्त्री मंडळ, पिंपरी भाजी मंडई येथील असून ट्रॉलीवरील सजावटीचे काम ए. टी. डेकोरेशन यांनी केले होते.
पोलिसांच्या सतर्कतेमुळे मोठी दुर्घटना टळली असून गणेश विसर्जन मिरवणुकीदरम्यान बंदोबस्तावर असलेल्या पोलिसांचे प्रसंगावधान कौतुकास्पद ठरले.
