DakshTimes News Network
काशिनाथ शिंदे
पिंपरी-चिंचवड : गौरी-गणपतीच्या सजावटीदरम्यान घरातून चोरीला गेलेले तब्बल 30.546 ग्रॅम वजनाचे सोन्याचे मंगळसूत्र व पेंडल, शिरगाव-परंदवडी पोलिसांनी तपासाची चक्रे वेगाने फिरवत हस्तगत केले. या सोन्याच्या दागिन्यांची किंमत 2 लाख 84 हजार 847 रुपये असल्याची माहिती पोलिसांनी दिली.
या प्रकरणी 26 सप्टेंबर रोजी पोलिसांकडे तक्रार दाखल करण्यात आली होती. तक्रार प्राप्त होताच शिरगाव-परंदवडी पोलिसांनी तपास सुरू केला. घरातील व्यक्ती तसेच ये-जा करणाऱ्या व्यक्तींची माहिती घेत असताना घरात काम करणाऱ्या मोलकरीण महिलेवर पोलिसांचा संशय बळावला.
पोलिसांनी संशयित महिलेची चौकशी केली असता तिच्याकडून चोरीला गेलेला सोन्याचा ऐवज हस्तगत करण्यात आला. पोलिसांनी 30.546 ग्रॅम सोन्याचे मंगळसूत्र पेंडलसह जप्त केले असून त्याची बाजारातील किंमत 2 लाख 84 हजार 847 रुपये असल्याचे सांगण्यात आले.
गौरी-गणपतीच्या सणानिमित्त घरात देवीची सजावट करण्यात आली होती. याच कालावधीत घरातील सोन्याचा दागिना चोरीला गेल्याने कुटुंबीयांना धक्का बसला होता. तक्रार दाखल झाल्यानंतर पोलिसांनी तत्परतेने तपास करून चोरीचा मुद्देमाल हस्तगत केला.
या प्रकरणी संबंधित महिलेविरुद्ध गुन्हा दाखल करण्यात आला असून शिरगाव-परंदवडी पोलीस पुढील तपास करीत आहेत.
