DakshTimes News Network
काशिनाथ शिंदे
चिखली : मोरेवस्ती, चिखली येथील सिद्धीविनायक पब्लिक स्कूल व ज्युनिअर कॉलेजमध्ये राष्ट्रपिता महात्मा गांधी यांची जयंती विविध उपक्रमांनी उत्साहात साजरी करण्यात आली. महात्मा गांधी यांच्या प्रतिमेला पुष्पहार अर्पण करून तसेच दीपप्रज्वलनाने कार्यक्रमाची सुरुवात झाली.
या कार्यक्रमाला संस्थेच्या अध्यक्षा सौ. निर्मला जाधव, संस्थेचे सचिव श्री. मारुती जाधव, नगरसेवक कुंदन गायकवाड, संस्थेचे पदाधिकारी, शिक्षक, विद्यार्थी आणि पालक मोठ्या संख्येने उपस्थित होते.
यावेळी मनोगत व्यक्त करताना संस्थेच्या अध्यक्षा निर्मला जाधव यांनी महात्मा गांधी यांच्या स्वातंत्र्यलढ्यातील योगदानाची माहिती विद्यार्थ्यांना दिली. सत्य, अहिंसा आणि स्वच्छतेचा संदेश देत गांधीजींनी देशाच्या स्वातंत्र्यलढ्यात बजावलेली भूमिका विद्यार्थ्यांनी समजून घ्यावी, असे त्यांनी सांगितले.
यावेळी शाळेतील लहान विद्यार्थ्यांनी महात्मा गांधी यांच्या जीवनकार्यावर आधारित मनोगते सादर केली. ‘चले जाव’ आंदोलन, दांडी यात्रा तसेच स्वातंत्र्यलढ्यातील विविध आंदोलनांची माहिती विद्यार्थ्यांनी आपल्या भाषणातून विशद केली.
कार्यक्रमानंतर विद्यार्थ्यांनी शाळेचा परिसर तसेच आजूबाजूचा परिसर स्वच्छ केला. स्वच्छतेचा संदेश प्रत्यक्ष कृतीतून देत विद्यार्थ्यांनी महात्मा गांधी यांना अनोख्या पद्धतीने आदरांजली वाहिली. या उपक्रमाला पालकांनीही उत्स्फूर्त प्रतिसाद दिला.
स्वच्छता, शिस्त आणि सामाजिक बांधिलकीचा संदेश देत कार्यक्रमाची सांगता झाली.
