DakshTimes News Network
महावितरणच्या संचालकांनी वीज कर्मचाऱ्यांसोबत साजरी केली दिवाळी; कर्तव्यनिष्ठ कर्मचाऱ्यांचे केले कौतुक
काशिनाथ शिंदे
पिंपरी : दिवाळी आणि भाऊबीजेच्या सणानिमित्त महावितरणचे संचालक (संचालन) धनंजय औंढेकर यांनी पिंपरी विभागातील गणेशाम वीज उपकेंद्राला सदिच्छा भेट देत तेथील वीज कर्मचाऱ्यांसोबत दिवाळीचा आनंद साजरा केला. सणासुदीच्या काळातही नागरिकांना अखंडित वीजपुरवठा मिळावा यासाठी अहोरात्र सेवा बजावणाऱ्या कर्मचाऱ्यांचे त्यांनी विशेष कौतुक केले.
यावेळी औंढेकर यांनी उपकेंद्रातील लाइनमन आणि यंत्रचालकांशी संवाद साधत त्यांच्या दैनंदिन कामकाजातील अडचणी जाणून घेतल्या. वीजबिलांची शंभर टक्के वसुली, वीजगळती कमी करणे आणि ग्राहकांना अखंडित वीजपुरवठा करणे या महत्त्वाच्या विषयांवर त्यांनी कर्मचाऱ्यांना मार्गदर्शन केले.
वीज यंत्रणेतील बिघाड, त्यावरील उपाययोजना आणि स्थानिक परिस्थितीची अचूक माहिती प्रत्यक्ष काम करणाऱ्या लाइनमनला असते. त्यामुळे कर्मचाऱ्यांनी जबाबदारीने आणि सकारात्मक दृष्टिकोनातून काम केल्यास महावितरणच्या कार्यपद्धतीत महत्त्वपूर्ण बदल घडवून आणता येऊ शकतात, असे औंढेकर यांनी स्पष्ट केले.
दिवाळीच्या काळात सर्वत्र आनंदोत्सव सुरू असताना नागरिकांच्या घरात प्रकाश कायम राहावा, यासाठी महावितरणचे कर्मचारी स्वतःच्या सणाचा आनंद बाजूला ठेवून कर्तव्य बजावत असतात. भाऊबीजेच्या दिवशीही कुटुंबीयांपासून दूर राहून जनसेवेला प्राधान्य देणाऱ्या या कर्मचाऱ्यांच्या समर्पणाची दखल घेत त्यांच्याप्रती कृतज्ञता व्यक्त करण्यासाठी ही भेट असल्याचे त्यांनी सांगितले.
या भेटीमुळे वरिष्ठ अधिकारी आणि प्रत्यक्ष क्षेत्रात काम करणारे कर्मचारी यांच्यातील संवाद अधिक दृढ झाला. यावेळी अतिरिक्त कार्यकारी अभियंता ज्ञानदेव तरंगे यांच्यासह महावितरणचे अधिकारी व कर्मचारी उपस्थित होते.
