DakshTimes News Network
उपमहापौर शर्मिला बाबर यांच्या हस्ते सांगवी येथील पुतळ्यास पुष्पहार अर्पण; पदाधिकारी, अधिकारी व नागरिकांची उपस्थिती
काशिनाथ शिंदे
पिंपरी : महाराष्ट्राचे माजी मुख्यमंत्री आणि पद्मभूषण पुरस्काराने सन्मानित दिवंगत वसंतदादा पाटील यांच्या जयंतीनिमित्त पिंपरी-चिंचवड महानगरपालिकेच्या वतीने त्यांना अभिवादन करण्यात आले. सांगवी येथील त्यांच्या पुतळ्यास उपमहापौर शर्मिला बाबर यांच्या हस्ते पुष्पहार अर्पण करून आदरांजली वाहण्यात आली.
यावेळी विरोधी पक्षनेते भाऊसाहेब भोईर, ‘ह’ प्रभाग अध्यक्षा तृप्ती कांबळे, उपायुक्त अण्णा बोदडे, क्षेत्रीय अधिकारी संतोष कोराड, जनता संपर्क अधिकारी प्रफुल्ल पुराणिक यांच्यासह महानगरपालिकेच्या विविध विभागांतील कर्मचारी आणि नागरिक उपस्थित होते.
दिवंगत वसंतदादा पाटील यांनी आपल्या प्रदीर्घ सार्वजनिक जीवनात महाराष्ट्राच्या विकासासाठी मोलाचे योगदान दिले. विशेषतः सहकार चळवळीचा विस्तार, शिक्षणाचा प्रसार आणि कृषी क्षेत्राच्या विकासासाठी त्यांनी महत्त्वपूर्ण कार्य केले. त्यांच्या दूरदृष्टीपूर्ण नेतृत्वामुळे महाराष्ट्राच्या सामाजिक आणि आर्थिक विकासाला नवी दिशा मिळाली. त्यांच्या कार्याचा आणि विचारांचा वारसा आजही प्रेरणादायी ठरत आहे.
