DakshTimes News Network
सफाई कामगारांना दिवाळी भेटवस्तू देत संस्थापक अध्यक्ष संतोष सौंदणकर यांनी जपली सामाजिक बांधिलकी; श्रमाचा सन्मान करणारा स्तुत्य उपक्रम
काशिनाथ शिंदे
पिंपरी-चिंचवड : शहर स्वच्छ आणि सुंदर ठेवण्यासाठी ऊन-पाऊस, सण-उत्सवाची पर्वा न करता अहोरात्र मेहनत करणाऱ्या सफाई कामगारांच्या आयुष्यातही दिवाळीचा आनंद फुलावा, या उदात्त हेतूने रमामंगल सोशल फाउंडेशनच्या वतीने सफाई कामगारांसोबत दिवाळी साजरी करण्यात आली. यावेळी कामगारांना दिवाळी भेटवस्तू देऊन त्यांच्या चेहऱ्यावर आनंद फुलविण्यात आला. संस्थापक अध्यक्ष संतोष सौंदणकर यांच्या पुढाकारातून राबविण्यात आलेल्या या उपक्रमातून सामाजिक बांधिलकी आणि माणुसकीचे दर्शन घडले.
दिवाळी हा आनंद, उत्साह आणि प्रकाशाचा सण आहे. मात्र, शहरातील नागरिकांची दिवाळी स्वच्छ वातावरणात साजरी व्हावी, यासाठी सफाई कामगार आपले कर्तव्य बजावत असतात. त्यांच्या श्रमांची जाणीव ठेवून त्यांच्याप्रती कृतज्ञता व्यक्त करण्याच्या उद्देशाने फाउंडेशनने हा उपक्रम आयोजित केला.
यावेळी संस्थापक अध्यक्ष संतोष सौंदणकर म्हणाले की, शहर स्वच्छ ठेवण्यात सफाई कामगारांचे योगदान अत्यंत मोलाचे आहे. त्यांच्या अथक परिश्रमांमुळेच नागरिकांना स्वच्छ आणि सुंदर परिसरात राहता येते. ऊन, पाऊस तसेच सण-उत्सवाची पर्वा न करता हे कर्मचारी आपले कर्तव्य प्रामाणिकपणे पार पाडतात. त्यामुळे त्यांच्या चेहऱ्यावर आनंद फुलविणे आणि त्यांच्या श्रमांचा सन्मान करणे हे आपले सामाजिक कर्तव्य आहे. या उपक्रमातून केवळ भेटवस्तूंचे वाटप न करता कष्टकरी हातांप्रती कृतज्ञता व्यक्त करण्याचा प्रयत्न केला आहे. समाजातील गरजू, कष्टकरी आणि दुर्लक्षित घटकांसाठी फाउंडेशनच्या माध्यमातून भविष्यातही असे उपक्रम सातत्याने राबविण्यात येतील, असे त्यांनी सांगितले.
या कार्यक्रमास वैद्यकीय आरोग्य अधिकारी डॉ. लक्ष्मण गोफणे, थेरगाव रुग्णालयाचे प्रमुख डॉ. शंकर मोसलगी, आरोग्य निरीक्षक मुकेश जगताप, प्रभारी आरोग्य निरीक्षक प्रकाश खलसे, दीपक सरोदे, अशोक नवले, सुभाष मालुसरे, कार्याध्यक्ष सुमित कांबळे, उपाध्यक्ष गणेश ओगले, खजिनदार संतोष मोरजकर, फिरोज खान, सचिन घाडगे, अश्विन मायनाळे, महादेव सुतार, रुबान शेख, महेश कुंभार, समीर कुरळे यांच्यासह आरोग्य विभागातील अधिकारी, कर्मचारी, मुकादम आणि घंटागाडी कामगार मोठ्या संख्येने उपस्थित होते.
रमामंगल सोशल फाउंडेशनच्या या उपक्रमामुळे सफाई कामगारांची दिवाळी अधिक आनंददायी झाली. समाजातील कष्टकरी घटकांच्या श्रमांचा सन्मान करत त्यांच्या आनंदात सहभागी होण्याचा संदेश या उपक्रमाने दिला. दिवाळीच्या रोषणाईसोबत माणुसकीचा दीप उजळविणारा हा उपक्रम उपस्थितांसाठी प्रेरणादायी ठरला.
